فرمان الہی
نماز کے اوقات
ڈچ ہاکی کوچ رولنٹ آلٹمنز نے رانا ظہیر اکیڈمی میں کوچنگ شروع کر دی۔
اسپورٹس بورڈ پنجاب کے تعاون سے رانا ظہیر اکیڈمی کے زیر اہتمام ٹریننگ کیمپ لگایا گیا ہے جس میں 60 کھلاڑی ہیں اور انہیں 3 گروپس میں تقسیم کیا گیا ہے۔
رولنٹ آلٹمنز نے میڈیا سے گفتگو کرتے ہوئے بتایا کہ نوجوان کھلاڑیوں میں مہارت ہے اور وہ گیم کو سمجھتے ہیں۔
انہوں نے کہا کہ تسلسل کے ساتھ اچھا کھیلنے کی ضرورت ہے اور یہی ہم اِنہیں سکھا رہے ہیں۔
رولنٹ آلٹمنز نے بتایا کہ پوری دنیا کی طرح میں بھی افسردہ ہوں کہ پاکستان ٹیم نے ورلڈ کپ کے لئے کوالیفائی نہیں کیا، ہم امید کر سکتے ہیں کہ پاکستان ہاکی ٹیم درست سمت کی طرف گامزن ہو۔
انہوں نے کہا کہ پہلا ہدف پیرس اولمپکس کے لئے کوالیفائی ہونا چاہئے، کوالیفائنگ راؤنڈ مشکل ہے۔
رولنٹ آلٹمنز کا کہنا تھا کہ جہاں اس وقت ٹیم ہے وہاں سے نکل کر اوپر آنے میں وقت لگے گا، اچھی سمت اختیار کریں اور پالیسی کو تسلسل کے ساتھ اپنائیں۔
ڈچ ہاکی کوچ نے کہا کہ اچھے ڈویلپمنٹ اور ہائی پرفارمنس پروگرام ٹیم کے لئے شروع کریں، بیلجئیم اور انڈیا کو سامنے رکھیں انہیں یہاں تک پہنچنے میں آٹھ دس سال لگے۔
رولنٹ آلٹمنز نے مزید کہا کہ توقع کے مطابق رزلٹ نہ آنے پر پروگرام کو تبدیل مت کریں اس پر قائم رہیں۔
