عدالت کا اتنی جلدی الیکشن کرانے کا فیصلہ سمجھ سے بالاتر ہے: وکیل PTI

پاکستان تحریکِ انصاف کے وکیل فیصل چوہدری کا کہنا ہے کہ لاہور ہائی کورٹ کا اتنی جلدی الیکشن کرانے کا فیصلہ سمجھ سے بالاتر ہے۔

یہ بات پاکستان تحریکِ انصاف کے وکیل فیصل چوہدری نے سپریم کورٹ کے باہر میڈیا سے گفتگو کرتے ہوئے کہی۔

ان کا کہنا ہے کہ امید ہے کہ سپریم کورٹ آج اس اہم معاملے پر سماعت کرے گی، پنجاب اسمبلی کے ڈپٹی اسپیکر متنازع شخصیت ہیں۔

پی ٹی آئی نے لاہور ہائیکورٹ کا فیصلہ سپریم کورٹ میں چیلنج کر دیا

پاکستان تحریکِ انصاف (پی ٹی آئی) نے گزشتہ روز کے لاہور ہائی کورٹ کے وزیرِ اعلیٰ پنجاب کے انتخاب سے متعلق فیصلے کو آج سپریم کورٹ میں چیلنج کر دیا۔

فیصل چوہدری کا کہنا ہے کہ اگر پہلا الیکشن غلط تھا تو دوسرا راؤنڈ کیسے ہو سکتا ہے؟

ان کا کہنا ہے کہ لاہور ہائی کورٹ کے غیر قانونی فیصلے کے خلاف اپیل دائر کر دی ہے۔

پی ٹی آئی کے وکیل کا مزید کہنا ہے کہ لاہور ہائی کورٹ کے فیصلے میں کئی ابہام ہیں۔

انہوں نے یہ بھی کہا کہ حمزہ شہباز کو وزارتِ اعلیٰ سے ہٹا دینا چاہیے تھا، اسپیکر پنجاب اسمبلی پرویز الہٰی کے حقوق سلب کیے گئے ہیں۔