چیف جسٹس کے بینچ کو فکسڈ کہنا افسوسناک ہے: شیخ رشید

عوامی مسلم لیگ کے سربراہ شیخ رشید نے حکمراں اتحاد پر تنقید کرتے ہوئے کہا ہے کہ چیف جسٹس کے بینچ کو فکسڈ بینچ کہنا انتہائی افسوس ناک ہے۔

شیخ رشید نے اپنے ٹوئٹ میں لکھا ہے کہ 2 ووٹوں کے سازشی پرائم منسٹر پر بھی تحریکِ عدم اعتماد لانا ہو گی۔

اُنہوں نے لکھا ہے کہ فوج کے بعد اب سپریم کورٹ کونشانہ بنایا جا رہا ہے۔

شیخ رشید نے حکمراں اتحاد سے سوال کیا ہے کہ اتحادی بتائیں کہ ان کے پسندیدہ جج کون سے ہیں؟

اُنہوں نے برہمی کا اظہار کرتے ہوئے لکھا ہے کہ یہ اثاثے بیچ کر معیشت کو مزید تباہ کر رہے ہیں، اب مسلم لیگ ن بھی الیکشن سے بھاگ رہی ہے۔

شیخ رشید نے اپنے ایک اور ٹوئٹ میں لکھا ہے کہ حکومت نے بائیکاٹ صرف میڈیا پر کیا اور سپریم کورٹ کو نشانے پر لیا۔

اُنہوں نے لکھا ہے کہ زرداری نے پہلے چوہدری برادرن کو لڑوایا اب شریف برادران ان کے نشانے پر ہیں۔

شیخ رشید نے مزید لکھا ہے کہ حکمراں اتحاد پہلے سیاسی عدم استحکام اور معیشت کی تباہی کی وجہ بنا، پھر فوج پر تنقید کی اور اب چیف جسٹس پر بھی حملہ آور ہوئے ہیں۔

اُنہوں نے اپنے ٹوئٹ میں مطالبہ کیا ہے کہ کل پرائم منسٹر ہاؤس میں ہونے والی پریس کانفرنس کا سپریم کورٹ نوٹس لے۔