کراچی سے کویت کیلئے بک کنٹینر سے 90 کلو گرام ہیروئن برآمد

کراچی سے کویت کے لیے بک کیے گئے کنٹینر سے 90 کلو گرام سے زائد ہیروئن برآمد ہوئی ہے۔

دیگر کارروائیوں میں بھی اے این ایف کے عملے نے منشیات کی بڑی مقدار برآمد کی ہے۔

ترجمان اے این ایف کے مطابق کراچی انٹرنیشنل کنٹینر ٹرمینل پر کویت بھیجنے کے لیے بک کنٹینر سے 90 کلو گرام سے زائد ہیروئن برآمد ہوئی ہے۔

اسلام آباد موٹر وے ٹول پلازہ کے قریب لوڈر گاڑی سے 2 کلو 600 گرام  ہیروئین، 2 کلو 400 گرام چرس اور 988 گرام آئس برآمد ہوئی ہے۔

منشیات کے ہمراہ باجوڑ کے رہائشی 2 ملزمان کو گرفتار کرلیا گیا ہے۔

فیصل آباد ایئر پورٹ پر اے این ایف اور اے ایس ایف نے مشترکہ کارروائی کرتے ہوئے دبئی کے مسافر کے لیپ ٹاپ سے 954 گرام چرس برآمد کی ہے۔

تربت کیچ کے علاقے سے 94 کلو گرام چرس اور چمن کے علاقے سے 2881 لیٹر ممنوعہ کیمیکل برآمد کیا گیا ہے۔

تمام ملزمان کے خلاف انسدادِ منشیات ایکٹ کے تحت مقدمات درج کیے گئے ہیں۔