ن لیگ کے ممبران بھی ہمارے ساتھ آنا چاہتے ہیں، فواد چوہدری کا دعویٰ

پاکستان تحریک انصاف (پی ٹی آئی) کے رہنما فواد چوہدری کا کہنا ہے کہ مسلم لیگ ن کے ممبران بھی ہمارے ساتھ آنا چاہتے ہیں، جن حلقوں میں پی ٹی آئی یا ق لیگ کے امیدوار نہیں ہوں گے وہاں ن لیگ سے آنے والوں پر غور کریں گے۔

لاہور میں میڈیا سے گفتگو کرتے ہوئے فواد چوہدری نے کہا کہ 11 جنوری سے پہلے اعتماد کا ووٹ حاصل کر لیں گے، ہم نیشنل الیکشن کی طرف بڑھ رہے ہیں، ہماری امید ہے مارچ اور اپریل انتخابات کے مہینے ہیں۔

فواد چوہدری نے کہا کہ کل بلوچستان میں 8 دھماکے ہوئے، 8 ماہ میں دہشت گردی میں 52 فیصد اضافہ ہوگیا ہے۔

آرمی میں نئی کمان آنے کے بعد فرق پڑا ہے، فواد چوہدری

فواد چوہدری نے کہا کہ ایک تو ہر وقت ریکارڈنگز ہوتی رہتی ہیں یہ بھی بڑا مسئلہ ہے۔

پی ٹی آئی رہنما نے کہا کہ پاکستان میں فوری انتخابات کی ضرورت ہے، یہ حکومت الیکشن کروانے کو تیار نہیں، حکومت جانتی ہے انتخابات نہیں جیت سکتی۔

 فواد چوہدری نے کہا کہ ہم سیاسی استحکام چاہتے ہیں، الیکشن کروانے کیلئے اداروں کو اپنا کردار ادا کرنا چاہیے، فیصلہ کرنے والے ادارے ملکی حالات کو دیکھیں۔

انہوں نے کہا کہ ہم معیشت پر ایک وائٹ پیپر لا رہے ہیں، اگر آئی ایم ایف سے ہمارا پروگرام نہیں چلتا تو ملک ڈیفالٹ کر جائے گا، اگر آئی ایم ایف کی شرائط مانی جاتی ہیں تو ڈالر مزید مہنگا ہو جائے گا۔

فواد چوہدری نے مزید کہا کہ ہم نے 55 لاکھ نوکریاں پیدا کی تھیں، اس حکومت نے صرف ٹیکسٹائل سیکٹر میں 15 لاکھ نوکریاں ختم کی ہیں۔