انتخابی شیڈول کے اعلان کے بعد حلقوں کی حدود تبدیل نہیں ہو سکتیں: الیکشن کمیشن

الیکشن کمیشن آف پاکستان کا کہنا ہے کہ سندھ کے بلدیاتی قانون میں ہے کہ الیکشن کے شیڈول کے اعلان کے بعد حلقوں کی حدود تبدیل نہیں ہو سکتیں، سندھ حکومت کے نوٹیفکیشن ایس ایل جی اے قانون کی خلاف ورزی ہیں۔

الیکشن کمیشن نے کراچی اور حیدر آباد میں ہونے والے بلدیاتی انتخابات کے حوالے سے جاری کیے گئے حکم نامے میں کہا ہے کہ سندھ میں دوسرے مرحلے کے انتخابات 15 جنوری کو ہی ہوں گے۔

حکم نامے پر چیف الیکشن کمشنر سکندر سلطان راجہ اور چاروں ممبران کے دستخط ہیں۔

حکم نامے کے ذریعے الیکشن کمیشن نے ہدایت کی ہے کہ سیکریٹری اور اسپیشل سیکریٹری کراچی پہنچیں، چیف سیکریٹری اور آئی جی سندھ سیکیورٹی کے فول پروف انتظامات کریں۔

الیکشن کمیشن کا اپنے حکم نامے میں کہنا ہے کہ کراچی، حیدر آباد، ٹھٹھہ ڈویژن میں الیکشن کی تیاری مکمل ہے، بیلٹ پیپرز چھپ چکے ہیں، الیکشن مواد کی بلک بریکنگ ہو چکی ہے۔

اپنے جاری کیے گئے حکم نامے میں الیکشن کمیشن کا کہنا ہے کہ پولنگ اسٹاف کی تقرری ہو چکی ہے جو پولنگ کے لیے تیار ہے۔

حکم نامے میں الیکشن کمیشن نے کہا ہے کہ پولنگ سے 2 روز قبل مقامی علاقوں کا نوٹیفکیشن واپس لینا آئین اور قانون کے منافی ہے۔

الیکشن کمیشن کا اپنے حکم نامے میں مزید کہنا ہے کہ سندھ الیکشن کمشنر کے سروے کے مطابق دادو میں صورتِ حال پولنگ کے لیے ساز گار ہے۔

جاری کیے گئے حکم نامے میں الیکشن کمیشن کا یہ بھی کہنا ہے کہ میہڑ اور خیر پور ناتھن شاہ میں الیکشن ملتوی کرنےکی درخواست بھی مسترد کرتے ہیں۔

سندھ حکومت نے انتخابات مؤخر کرنے کا کل اعلان کیا

واضح رہے کہ گزشتہ شب سندھ حکومت کی جانب سے ایم کیو ایم کے مطالبات کو منظور کرتے ہوئے 15 جنوری کو کراچی، حیدر آباد اور دادو میں ہونے والے بلدیاتی انتخابات مؤخر کرنے اور حلقہ بندیوں کا نوٹیفکیشن واپس لینے کا اعلان کیا گیا تھا۔

بلدیاتی انتخابات 15 جنوری کو ہی ہونگے: الیکشن کمیشن

آج الیکشن کمیشن نے سندھ حکومت کی بلدیاتی انتخابات ملتوی کرنے کی درخواست مسترد کر دی اور کہا کہ سندھ کے دوسرے مرحلے کے بلدیاتی انتخابات 15 جنوری کو ہی ہوں گے۔

کراچی میں بلدیاتی انتخابات 15 جنوری کو ہی ہوں گے: الیکشن کمیشن

الیکشن کمیشن نے سندھ حکومت کی بلدیاتی انتخابات ملتوی کرنے کی درخواست مسترد کر دی۔

چیف الیکشن کمشنر سکندر سلطان راجہ کی زیرِ صدارت الیکشن کمیشن آف پاکستان میں اہم اجلاس قرار دیا گیا کہ کراچی ڈویژن، حیدر آباد اور دیگر اضلاع میں انتخابات شیڈول کے مطابق 15 جنوری کو ہی ہوں گے۔

الیکشن کمیشن نے درخواست کی کہ وفاقی وزارتِ داخلہ انتہائی حساس پولنگ اسٹیشنز پر فوج اور رینجرز کی تعیناتی یقینی بنائے۔