شیخ رشید سیاسی یتیمی اور بے روزگاری کا شکار ہو چکے، شرجیل میمن

کراچی ( اسٹاف رپورٹر)وزیر اطلاعات سندھ شرجیل انعام میمن نے کہا ہے کہ شیخ رشید ، سابق صدر آصف علی زرداری پر جھوٹے اور من گھڑت الزامات لگا رہے ہیں ، شیخ رشید سیاسی یتیمی اور سیاسی بے روزگاری کا شکار ہو چکے ہیں ،شیخ رشید سی وی لیکر گھوم رہے ہیں، تاہم پاکستان پیپلز پارٹی، ن لیگ اور جے یو آئی ف نے انہیں نوکری پر رکھنے سے جواب دے دیا ہے، ایک بیان میں انھوں نے کہا کہ شیخ رشید لال حویلی سے بے دخل ہونے سے بچنے کے لیے بیہودہ الزامات لگاکر ملک میں آگ لگانے کی سازش کر رہے ہیں ، انہوں نے کہا کہ سابق صدر آصف علی زرداری نے پاکستان کھپے کا نعرہ لگا کر مشکل حالات میں ملک کو بچایا تھا ، صوبائی وزیر نے کہا کہ پی ٹی آئی اور اس کے حواریوں کا دھرنے اور احتجاج کرنا مقدر بن گیا ہے ، غیر سیاسی لوگوں کو مصنوعی طریقے سے قوم پر مسلط کیا گیا تھا ، لاوارث بننے کے بعد یہ لوگ پاگل ہو چکے ہیں ، ان کو پتہ ہے کہ سہاروں کے بغیر یہ یونین کونسل کا الیکشن بھی نہیں جیت سکتے ۔ انہوں نے کہا کہ محسن نقوی کا انتخاب الیکشن کمیشن نے آئین و قانون کے مطابق کیا ہے ، محسن نقوی اچھی شہرت کی شخصیت ہیں ۔