فرمان الہی
نماز کے اوقات
پاکستان سپر لیگ (پی ایس ایل) 8 کے چھٹے میچ میں کوئٹہ گلیڈی ایٹرز نے کراچی کنگز کو 6 رنز سے شکست دے دی۔
ایچ بی ایل پی ایس ایل 8 میں کراچی کنگز کو مسلسل تیسری شکست کا سامنا کرنا پڑ گیا ہے، کوئٹہ گلیڈی ایٹرز کی طرف سے مارٹن گپٹل نے سنچری اسکور کی جبکہ محمد حسنین نے 2 وکٹیں اپنے نام کیں۔
کوئٹہ گلیڈی ایٹرز نے مقررہ 20 اوورز میں 7 وکٹ پر 168 رنز بنائے اور کراچی کنگز کے لیے 169 رنز کا ہدف سیٹ کیا، اننگز کی خاص مارٹن گپٹل کی 67 گیندوں پر 117 رنز کی اننگز رہی۔
ہدف کے تعاقب میں کوئٹہ گلیڈی ایٹرز کی طرح کراچی کنگز کی بھی ابتدائی وکٹیں جلدی گر گئیں، شرجیل خان صفر، حیدر علی صفر اور جیم ونس 22 رنز بناکر پویلین لوٹے ٹیم نے 35 کے مجموعے پر 3 کھلاڑی پویلین لوٹ چکے تھے۔
چوتھی وکٹ پر شعیب ملک اور میتھوویڈ نے 35 رنز کی شراکت بنائی، ویڈ 15 رنز بناکر میدان چھوڑ گئے، 76 کے اسکور پر کپتان عماد وسیم صرف 5 رنز بناکر لوٹ گئے۔
اس کے بعد شعیب ملک نے عرفان خان نیازی کے ساتھ مل کر ہدف کا تعاقب کیا آخری اوور میں ٹیم کو 6 گیندوں پر 24 رنز درکار تھے، لیکن جوڑی 6 رنز پہلے ہی ہمت ہار گئی، یوں فتح کی دیوی آج کوئٹہ گلیڈی ایٹرز پر مہربان ہوئی۔
شعیب ملک نے اس دوران ناقابل شکست 71 رنز بنائے، انہوں نے اس دوران 1 چھکا اور 8 چوکے لگائے جبکہ عرفان خان نے 37 رنز کے لیے 3 چھکے اور 1 چوکا لگایا۔
نیشنل اسٹیڈیم کراچی میں کھیلے گئے میچ میں کراچی کنگز نے کوئٹہ گلیڈی ایٹرز کے خلاف ٹاس جیت کر فیلڈنگ کا فیصلہ کیا تھا۔
کوئٹہ گلیڈی ایٹرز کی ابتدائی 4 وکٹیں صرف 32 کے اسکور پر گر گئی، جیسن روئے صفر، عبدالواحد بنگلزئی صفر، عمر اکمل 4 اور کپتان سرفراز احمد 5 رنز بنا کر پویلین لوٹ گئے۔
پانچویں وکٹ پر مارٹن گپٹل اور افتخار احمد نے 69 رنز کی شراکت قائم کی اور کوئٹہ گلیڈی ایٹرز کو بہتر پوزیشن میں لے آئے۔
افتخار احمد اس دوران محمد عامر کو چھکا مارنے کی کوشش میں باؤنڈری لائن پر کیچ آؤٹ ہوگئے، انہوں نے 32 رنز کی اننگز میں 3 چوکے مارے۔
کوئٹہ گلیڈی ایٹرز کے چھٹے آؤٹ ہونے والے بیٹر محمد نواز تھے، جو صرف 3 رنز بنا سکے۔
ایک طرف سے وکٹیں گرنے اور رن ریٹ گرنے کے باوجود مارٹن گپٹل نے 67 گیندوں پر 117 رنز کی دھواں دار باری کھیلی اور پی ایس ایل 8 میں پہلی سنچری بنانے میں کامیاب رہے۔
مارٹن گپٹل نے اس دوران 12 چوکے اور 5 چھکے لگائے لیکن اننگز کی آخری گیند پر چھکا لگانے کی کوشش میں باؤنڈری پر کیچ آؤٹ ہوگئے۔
اس سے قبل ٹاس کے لیے سرفراز احمد اور عماد وسیم میدان میں اترے، عماد نے ٹاس جیت کر سرفراز الیون کو بیٹنگ کی دعوت دی۔
ایونٹ میں کراچی کنگز کا یہ تیسرا جبکہ کوئٹہ گلیڈی ایٹرز کا یہ دوسرا مقابلہ ہے۔
کراچی کنگز کو ابتدائی دونوں میچز میں پشاور زلمی اور اسلام آباد یونائیٹڈ نے شکست سے دوچار کیا جبکہ کوئٹہ گلیڈی ایٹرز کو واحد شکست ملتان سلطانز سے ہوئی ہے۔
