فرمان الہی
نماز کے اوقات
شیخوپورہ، فاروق آباد(نمائندہ جنگ، نامہ نگار)شیخوپورہ کے تھانہ سٹی فاروق آباد کی حدودمیں سرگودھا روڈ پرقائم فلور ملز میں بطور گارڈ اور باورچی کام کرنیوالے ملازم نے کھانا ٹھیک نہ پکانے پر ڈانٹ سے مشتعل ہوکر فلور ملز مالک کو ملز کے دروازے پر گولیاں مار کر مارڈالا ،جس کے بعداپنے گھر پہنچ کر اپنی بیوی، 2بچوں اورمکان مالکہ کو بھی فائرنگ سے قتل کردیا۔ 5افراد کے سفاکانہ قتل کے بعد ملزم نے گرفتاری دیدی۔ ہفتے کی شام کھانا درست طریقے سے نہ پکانے پر فلور ملز میں سکیورٹی گارڈ اور باورچی کی ڈیوٹی کرنیوالے تنویر اور فلور ملزکے مالک نذیر ہاشمی کے درمیان جھگڑا ہوا۔ جس کے کچھ دیر بعد ملزم تنویر نے مالک نذیر ہاشمی کو فلور ملز کے دروازے پر ہی فائرنگ کرکے جان سے مارڈالا۔گولیاں لگنے سے ملز کے 2دیگر ملازم صبور اور شیرعالم شدید زخمی ہوئے جن کو ہسپتال پہنچایا گیا، ان میں ایک کی حالت نازک ہے۔اس کے بعدملزم تنویر اپنے گھرنورپورہ پہنچا جہاں اپنی26سالہ بیوی فضہ، 4سالہ بیٹےمحمد علی اور 13ماہ کی شیرخوار بیٹی نورفاطمہ کوگولیاں مارکر موت کے گھاٹ اتارا۔ اسی دوران وہاں موجود مکان مالکہ بشریٰ بی بی اسکے بیوی بچوں کو بچانے آئی تو اسے بھی فائرنگ کرکے مار ڈالا۔
