عمران خان کا وفاقی وزیرِ صحت عبدالقادر پٹیل کو 10 ارب ہرجانے کا نوٹس

پاکستان تحریکِ انصاف (پی ٹی آئی) کے چیئرمین عمران خان نے وفاقی وزیرِ صحت عبدالقادر پٹیل کو 10 ارب روپے کے ہرجانے کا نوٹس بھجوا دیا۔

عمران خان کی جانب سے بھجوائے گئے نوٹس کے متن میں کہا گیا ہے کہ عبدالقادر پٹیل 15 روز میں اپنے الزامات واپس لیں۔

نوٹس کے متن میں کہا گیا ہے کہ عبدالقادر پٹیل فوری طور پر چیئرمین پی ٹی آئی سے غیر مشروط معافی مانگیں۔

عمران خان کے بھیجے گئے نوٹس میں مطالبہ کیا گیا ہے کہ عبدالقادر پٹیل 10 ارب روپے بطور ہرجانہ ادا کریں، جسے شوکت خانم اسپتال میں جمع کروایا جائے گا۔

میڈیکل رپورٹ کے مطابق عمران خان کی ذہنی حالت پر سوالیہ نشان ہے، عبدالقادر پٹیل

وفاقی وزیر صحت عبدالقادرپٹیل نے دعویٰ کیا ہے کہ سابق وزیراعظم عمران خان کے یورین سیمپل سے شراب اور کوکین کے اجزاء پائے گئے ہیں۔

نوٹس میں عمران خان کی جانب سے کہا گیا ہے کہ عبدالقادر پٹیل نے معافی نہ مانگی تو قانونی کارروائی آگے بڑھائیں گے۔

واضح رہے کہ وفاقی وزیر صحت عبدالقادر پٹیل نے پریس کانفرنس میں دعویٰ کیا تھا کہ سابق وزیرِ اعظم عمران خان کے یورین سیمپل سے شراب اور کوکین کے اجزاء پائے گئے ہیں۔

انہوں نے کہا تھا کہ میڈیکل رپورٹ میں عمران خان کی ذہنی حالت پر بھی سوالیہ نشان لگایا گیا ہے اور کہا گیا ہے کہ اُن کی حرکات و سکنات فٹ آدمی کی نہیں۔

وفاقی وزیر نے یہ بھی کہا تھا کہ عمران خان کی میڈیکل رپورٹ میں فریکچر نہیں پاؤڈر نکلا ہے، چیئرمین پی ٹی آئی 5، 6 ماہ پلستر چڑھا کر گھومے، مگر فریکچر نہیں تھا۔