بھارتی ریسلنگ فیڈریشن کے چیف کی گرفتاری کا ایک اور الٹی میٹم

بھارت کی ریاست ہریانہ میں ہونے والی مہا پنچائیت نے حکومت کو بھارتی ریسلنگ فیڈریشن کے چیف برج بھوشن کو گرفتار کرنے کا الٹی میٹم دے دیا۔

بھارتی میڈیا کے مطابق مہا پنچائیت نے خواتین ریسلرز کی جانب سے ہراسانی کے الزامات کا سامنا کرنے والے برج بھوشن کو گرفتار کرنے کے لیے 9 جون کی ڈیل لائن دی ہے۔

رپورٹس کے مطابق گرفتاری نہ ہونے پر پنچائیت نے ریسلرز کے ساتھ دہلی تک مارچ کرنے اور ان کے احتجاج میں شامل ہونے کی دھمکی دی ہے۔

کسانوں کے رہنما راکیش ٹیکیٹ نے کہا ہے کہ حکومت کو مذاکرات سے مسائل حل اور برج بھوشن کو گرفتار کرنا چاہیے، گرفتاری نہ ہونے پر ہم ملک میں ہر جگہ پنچائیت لگائیں گے۔

بھارتی میڈیا کے مطابق پنچائیت، کسانوں کے رہنماؤں اور کئی سماجی کارکنوں کے ایک پیج پر آنے کے بعد حکومت کی جانب سے مذاکرات کا اشارہ دیا گیا ہے۔

بی جے پی کی رکنِ اسمبلی کی بھی خواتین ریسلرز کے احتجاج کی حمایت

بھارت کی حکمران جماعت بھارتیہ جنتا پارٹی کی خاتون رکنِ اسمبلی نے بھی خواتین ریسلرز کے احتجاج کی حمایت کردی۔

واضح رہے کہ 31 مئی کو بھارتی خواتین ریسلرز نے بھی جنسی ہراسانی پر فیڈریشن چیف برج بھوشن کے خلاف کارروائی کے لیے5 دن کا الٹی میٹم دیا تھا۔

ریسلرز کا کہنا ہے کہ کارروائی نہ ہوئی تو تمغے احتجاجاً دریائے گنگا میں بہا دیے جائیں گے جبکہ خواتین ریسلرز کا مطالبے نہ مانے جانے پر انڈیا گیٹ پر بھوک ہڑتال کا بھی منصوبہ ہے۔