• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

ملکی ترقی کا سفر روکنے والوں کو قوم کبھی معاف نہیں کرے گی، وزیراعظم

آج کا اخبار
ملک بھر سے
18 جون ، 2023
لاہور (نمائندہ جنگ، ایجنسیاں) وزیراعظم شہباز شریف نے کہا ہے کہ پاکستان تحریک انصاف کی حکومت نے اپنے چار سالہ دور میں ادارے تباہ کیے،عالمی کمپنیوں کو ہراساں کیا، ترقی کاسفر روکنے والوں کو قوم معاف نہیں کریگی ، گزشتہ حکومت کے تاریک دور میں لاہور سے دانستہ بدلہ لیا گیا،سیاسی بھرتیوں کے ذریعے اداروں کو تباہ کیا گیا۔ وزیراعظم شہباز شریف سے ترکیہ کی معروف کمپنی البئراک گروپ کے صدر احمد البئراک کی وفد کے ہمراہ ملاقات ہوئی۔ ملاقات میں وزیراعظم کے مشیر احد چیمہ، مسلم لیگ (ن) کے سینئر رہنما خواجہ حسان، ترک البئراک گروپ کے صدر، کمپنی بورڈ ممبرز اور متعلقہ اعلی حکام موجود تھے۔ وفد نے پاکستان میں سرمایہ کاری میں دلچسپی کا اظہار کیا۔ وزیراعظم نے کہا کہ البئراک نے لاہور میں سالڈ ویسٹ مینجمنٹ اور پبلک ٹرانسپورٹ میں گراں قدر خدمات سر انجام دیں، اپنے گزشتہ دور میں ہم نے لاہور کے رہائشیوں کو بین الاقوامی معیار کی سہولیات فراہم کیں، لاہور میں بین الاقوامی سرمایہ کاری سے جدید سفری سہولیات، سالڈ ویسٹ مینجمنٹ اور روزگار کے مواقع پیدا کیے۔انہوں نے کہا کہ گزشتہ حکومت کے چار سالہ تاریک دور میں لاہور سے دانستہ طور پر بدلہ لیا گیا، بین الاقوامی کمپنیوں کو بے جا ہراساں کیا گیا، سیاسی بھرتیوں سے اداروں کو تباہ کیا گیا، ملکی ترقی کے سفر کو روکنے والوں کو قوم کبھی معاف نہیں کرے گی۔دریں اثناالبئراک گروپ کے وفد نے پاکستان میں دیگر شعبوں میں بھی سرمایہ کاری میں گہری دلچسپی کا اظہار کیا۔ علاوہ ازیں وزیراعظم محمد شہباز شریف سے سابق وزیر مملکت و سابق رکنِ قومی اسمبلی سید جاوید علی شاہ نے ملاقات کی، ملاقات میں موجودہ ملکی سیاسی صورتحال پر گفتگوکی گئی۔
ملک بھر سے سے مزید