محکمہ موسمیات نے مون سون کے آخری اسپیل کی پیشگوئی کردی، ملک کے بالائی علاقوں میں 28 سے 30 ستمبر کے دوران بارشیں ہوں گی۔
محکمہ موسمیات کے مطابق 28 تا 30ستمبر کشمیر، گلگت بلتستان، چترال، دیر، سوات، ایبٹ آباد میں آندھی اور بارش کا امکان ہے۔
محکمہ موسمیات کے مطابق اس دوران بالائی خیبرپختونخوا، کشمیر، گلگت بلتستان میں بلند پہاڑوں پر برف باری کا بھی امکان ہے۔
اسلام آباد، راولپنڈی، پنجاب اور خیبر پختونخوا میں 28 اور 29 ستمبر کو گرج چمک کے ساتھ بارش کا امکان ہے۔
ادھر چکوال، مردان، پشاور، بنوں اور وزیرستان سمیت بالائی پنجاب میں 28 اور 29 ستمبر کو بارشیں متوقع ہیں۔
اسی دورانیے میں ژوب، برکھان، ڈیرہ غازی خان، ملتان، بہاولپور اور بہاولنگر میں گرج چمک کے ساتھ بارشیں ہونے کا امکان ہے۔
محکمہ موسمیات کے مطابق اس دوران بارش کے باعث درجہ حرارت میں نمایاں کمی کا امکان ہے۔