فرمان الہی
نماز کے اوقات
ن لیگ جنوبی کوریا کے صدر راجہ عامر اقبال کا کہنا ہے کہ سابق وزیرِ اعظم میاں نواز شریف کے استقبال کے لیے جنوبی کوریا اور جاپان سے ن لیگی کارکنان اور رہنما پاکستان پہنچیں گے اور لاہور ایئرپورٹ پر ہونے والے فقیدالشان استقبال میں شامل ہوں گے۔
یہ بات ن لیگ جنوبی کوریا کے صدر راجہ عامر اقبال نے اپنے جاپانی ہم منصب ملک نور اعوان سے گفتگو کرتے ہوئے کہی ہے۔
انہوں نے کہا ہے کہ میاں نواز شریف پاکستان کے مقبول ترین لیڈر ہیں، 21 اکتوبر کو عوام کا ٹھاٹیں مارتا سمندر ان کے استقبال کے لیے لاہور میں جمع ہو گا اور مینارِ پاکستان پر ان کی تقریر سنے گا۔
ن لیگ جنوبی کوریا کے صدر نے یہ بھی کہا ہے کہ مسلم لیگ ن اوورسیز میاں نواز شریف کے استقبال میں صفِ اول کے دستے کا کردار ادا کرے گی، جس میں وہ اور ملک نور اعوان دبئی سے میاں نواز شریف کے جہاز میں پاکستان پہنچیں گے۔
اس موقع پر ن لیگ جاپان کے صدر ملک نور اعوان نے کہا کہ وہ عنقریب دبئی روانہ ہو رہے ہیں، جہاں وہ میاں نواز شریف سے ملاقات کے بعد ان کے ہمراہ پاکستان آئیں گے جبکہ دیگر کئی ن لیگ جاپان کے کارکنان پہلے ہی پاکستان پہنچ چکے ہیں۔
ملک نور اعوا ن نے جبوبی کوریا میں مسلم لیگ ن کو فعال کرنے پر راجہ عامر اقبال کی تعریف کی اور کہا کہ اسحق ڈار کی ولولہ انگیز قیادت میں مسلم لیگ ن اوورسیز پارٹی کے سب سے طاقت ور ونگ کے طور پر سامنے آئی ہے اور ن لیگ اوورسیز میاں نواز شریف کو وزیر اعظم بنائے جانے تک پارٹی کے لیے اپنی خدمات جاری رکھے گی۔
