فرمان الہی
نماز کے اوقات
پنجاب حکومت نے اسمارٹ لاک ڈاؤن میں معمولی تبدیلی کر دی۔
اس حوالے سے جاری ہونے والے نوٹیفکیشن کے مطابق کال سینٹرز اور انٹرنیشنل آئی ٹی سینٹرز کو بھی کام کی اجازت دے دی گئی ہے۔
نوٹیفکیشن کے مطابق 8 اضلاع میں مارکیٹس کو آج اور کل کھولنے کی اجازت دے دی گئی ہے جبکہ شاپنگ مالز اور مارکیٹیں ہفتے اور اتوار کو بند رہیں گی۔
نوٹیفکیشن کے مطابق ریسٹورنٹ، سنیما اور جمنیزیم بھی آج معمول کے مطابق کھلے رہیں گے۔
نوٹیفکیشن میں بتایا گیا ہے کہ فیصلے کا اطلاق لاہور، ننکانہ صاحب، شیخوپورہ، قصور، گوجرانوالہ، نارووال، حافظ آباد اور سیالکوٹ پر ہوگا۔
محکمہ صحت پنجاب کے مطابق صوبے میں 24 گھنٹے کے دوران 46 ہزار 492 افراد اسموگ سے متاثر ہوئے ہیں۔ لاہور میں 24 گھنٹوں میں 1 ہزار 766 افراد اسموگ سے مختلف بیماریوں میں مبتلا ہوئے۔
محکمہ صحت کے مطابق اسموگ سے سانس، دمہ، نزلہ زکام، کھانسی، متلی، بخار، جسم درد اور مختلف انفیکشنز بڑھ رہے ہیں۔
واضح رہے کہ پنجاب میں اسموگ کے باعث گوجرانوالہ سمیت 5 اضلاع میں اسمارٹ لاک ڈاؤن لگانے کا فیصلہ کیا گیا ہے۔
10 نومبر سے 12 نومبر تک گوجرانوالہ، سیالکوٹ، نارووال، حافظ آباد اور وزیر آباد میں اسمارٹ لاک ڈاؤن ہو گا۔
اسمارٹ لاک ڈاؤن کے دوران تمام اسکول، دفاتر، مارکیٹیں، تفریحی مقامات، شادی ہال، سنیما گھر بند رہیں گے جبکہ فصلوں کی باقیات، کوڑا کرکٹ جلانے پر دفعہ 144 کے تحت مقدمات درج ہوں گے۔
کمشنر گوجرانوالہ نے شہریوں سے درخواست کی ہے کہ وہ نقل و حرکت کو محدود رکھیں۔
واضح رہے کہ نیشنل ڈیزاسٹر مینجمنٹ اتھارٹی (این ڈی ایم اے ) نے پہلے ہی اسموگ ایڈوائزری جاری کی ہوئی ہے۔
این ڈی ایم اے کے مطابق آئندہ ہفتےوسطی،جنوبی پنجاب میں اسموگ خطرناک حد تک پہنچنے کا امکان ہے۔
علاوہ ازیں پنجاب میں اسموگ کی روک تھام کے لیے آج سے پابندیوں کا نفاذ کردیا گیا ہے۔
اسموگ کی وجہ سے پنجاب حکومت نے مخصوص اضلاع میں جمعے کے دن چھٹی دینے کا فیصلہ کیا ہے۔
