کوئٹہ گلیڈی ایٹرز کا سرفراز احمد کو کپتانی سے ہٹانے کا فیصلہ

پاکستان سپر لیگ (پی ایس ایل) کی فرنچائز کوئٹہ گلیڈی ایٹرز کے کپتان سرفراز احمد کو 8 سال بعد کپتانی سے ہٹانے کا فیصلہ کرلیا گیا ہے۔

کوئٹہ گلیڈی ایٹرز کے مالک ندیم عمر نے جیو نیوز سے خصوصی گفتگو میں کہا کہ سرفراز احمد خود ٹیم کی کپتانی سے بریک لینا چاہتے ہیں، کوچ شین واٹسن ٹیم مینجمنٹ سے رائے لے کر نئے کپتان کا فیصلہ کریں گے۔

خیال کیا جارہا ہے کہ ان کی جگہ رائلی روسی یا سعود شکیل کو کپتان بنانے پر غور کیا جارہا ہے جس کا فیصلہ اگلے دو، چار روز میں ہوجائے گا۔

کوئٹہ گلیڈی ایٹرز نے پی ایس ایل 9 کےلیے کوچ معین خان کو بھی 8 سال بعد تبدیل کیا ہے، انہیں ٹیم ڈائریکٹر بنایا گیا ہے جبکہ شین واٹسن کو کوچنگ کے فرائض دیے گئے ہیں۔

محمد عامر کوئٹہ گلیڈی ایٹرز کیلئے سود مند ثابت ہوں گے، سرفراز احمد

محمد عامر نے 2 سال میں جہاں بھی لیگ کھیلی وہ ٹیم ٹاپ کر رہی ہے، کپتان کوئٹہ گلیڈی ایٹرز

اس حوالے سے ندیم عمر نے مزید کہا کہ کوئٹہ گلیڈی ایٹرز کی پرانی فیملی پھر سے اکٹھا ہونا شروع ہوگئی ہے، ٹیم کے مینٹور سر ویون ریچرڈ اگلے ہفتہ ٹیم کو جوائن کرلیں گے۔

انکا یہ بھی کہنا تھا کہ خواہش ہے کہ کیون پیٹرسن بھی کسی رول میں کوئٹہ گلیڈی ایٹرز کے ساتھ آجائیں۔

یاد رہے کہ پی ایس ایل کی فرنچائز کوئٹہ گلیڈی ایٹرز کو سرفراز احمد نے اپنی کپتانی میں 2019 کا ٹائٹل جتوایا تھا جبکہ 2016 اور 2017 میں کوئٹہ گلیڈی ایٹرز کی ٹیم فائنل کھیل چکی ہے۔