پیپلز پارٹی کے اویس قادر شاہ اسپیکر سندھ اسمبلی منتخب

25 فروری ، 2024

پیپلز پارٹی کے اویس قادر شاہ اسپیکر سندھ اسمبلی منتخب ہو گئے۔

منتخب ہونے کے بعد اویس قادر شاہ سے سابق اسپیکر سندھ اسمبلی آغا سراج درانی نے حلف لیا۔

سندھ اسمبلی کے اجلاس میں اسپیکر کے انتخاب کے لیے آخری ووٹ آغا سراج درانی نے کاسٹ کیا جس کے بعد گنتی کا عمل شروع کیا گیا تھا۔

اویس قادر شاہ نے 111 جبکہ ایم کیو ایم پاکستان کی صوفیہ شاہ نے 36 ووٹ حاصل کیے۔

پیپلز پارٹی کے اویس قادر شاہ کے اسپیکر اور ڈپٹی اسپیکر کے لیے نوید انتھونی کے کاغذات درست قرار دیے گئے تھے۔

ایم کیو ایم کی صوفیہ سعید شاہ کے اسپیکر کے لیے اور ڈپٹی اسپیکر کے لیے راشد خان کے کاغذاتِ نامزدگی درست قرار دیے گئے تھے۔

سندھ اسمبلی کے اجلاس میں خفیہ رائے شماری کے ذریعے ووٹنگ ہوئی۔

اس سے قبل اجلاس میں سنی اتحاد کونسل کے اراکین نے حلف اٹھایا تھا۔

اسپیکر آغا سراج درانی نے سنی اتحاد کونسل کے اراکین سے حلف لیا۔

اس موقع پر پیپلز پارٹی کے رہنما و رکن اسمبلی مراد علی شاہ نے کہا کہ آج اسمبلی میں حلف اٹھانے والے اراکین کو ویلکم کرتا ہوں، سندھ کے عوام کی خدمت کا سلسلہ جاری رکھیں گے۔

اسپیکر و ڈپٹی اسپیکر کے ووٹ کا ابھی تک فیصلہ نہیں کیا: سجاد سومرو

سنی اتحاد کونسل کے رکنِ سندھ اسمبلی سجاد علی سومرو کا کہنا ہے کہ آج ہمارے 9 ارکان نے حلف اٹھایا ہے، ہم پی ٹی آئی کے منتخب ایم پی ایز ہیں، سنی اتحاد کونسل سے الحاق کیا ہے۔

سجاد سومرو کا کہنا ہے کہ ہم پورے کراچی میں جیت چکے ہیں، نتائج تبدیل کیے گئے، لیاری مسائل کا گڑھ ہے، گٹر کے مسائل سے نکل نہیں سکے، ہم پورے کراچی کے حقوق کی بات کریں گے۔

انہوں نے کہا کہ اسپیکر اور ڈپٹی اسپیکر کے ووٹ کا ابھی تک فیصلہ نہیں کیا۔