پی ایس ایل کا معیار آئی پی ایل جیسا ہی ہے، جارڈن کاکس

02 مارچ ، 2024

اسلام آباد یونائیٹڈ میں شامل انگلینڈ کے جارڈن کاکس نے کہا ہے کہ پاکستان سپر لیگ (پی ایس ایل) میں مقابلے کا معیار بھارتی کرکٹ لیگ آئی پی ایل جیسا ہی ہے۔

جیو نیوز سے بات چیت کرتے ہوئے جارڈن کا کہنا تھا کہ اسلام آباد میں اپنا ٹائم انجوائے کر رہا ہوں۔

انہوں نے کہا کہ ٹیم بہترین ہے۔ مائیک ہیسن بہترین کوچ ہیں، ان کے ساتھ کام کرکے مزہ آرہا ہے۔

جارڈن کاکس کا کہنا تھا کہ راولپنڈی میں ہونیوالے میچز میں ٹیم اچھے نتائج کےلیے پُرامید ہے۔

انکا کہنا تھا کہ امید ہے کہ ہمشہ کی طرح اس بار بھی پنڈی میں فل ہاؤس ہوگا، پچھلے سال یہاں لاہور قلندرز کی جانب سے کھیلا تھا۔

انہوں نے کہا کہ راولپنڈی میں اسلام آباد یونائٹیڈ کو ناقابل یقین سپورٹ ملتی ہے۔

ٹیم میں اپنے کردار پر بات کرتے ہوئے جارڈن کا کہنا تھا کہ میرے لیے ذاتی ریکارڈ سے زیادہ اہم ٹیم کی جیت ہے۔ ٹیم میں میرا کردار ایک فنشر کا ہے، کوشش ہوتی ہے اس کو بخوبی نبھاؤں۔

جارڈن کاکس نے کہا کہ پاکستان سپر لیگ (پی ایس ایل) میں اعلیٰ معیار کا مقابلہ ہوتا ہے۔ پی ایس ایل میں مقابلے کا معیار آئی پی ایل جیسا ہی ہے۔

انکا کہنا تھا کہ پی ایس ایل میں مقامی کرکٹرز کا ٹیلنٹ کافی زبردست ہے، نوجوان کھلاڑیوں کےلیے یہاں ٹاپ پلیئرز کے ساتھ کھیلنا بڑی بات ہے۔