وفاق اور صوبوں کو مل کر کام کرنا ہوگا، وزیراعظم نے کراچی دورے کا مقصد بتادیا

وزیراعظم شہباز شریف نے کہا ہے کہ سب کے مینڈیٹ کا احترام کرنا ہوگا، معاشی استحکام کے لیے وفاق اور صوبوں کو مل کر کام کرنا ہوگا۔

وزیراعظم شہباز شریف نے کراچی میں وفاقی اور صوبائی کابینہ کے ارکان سے خطاب کرتے ہوئے وفاقی اور صوبائی وزرا کو مل کر کام کرنے کی ہدایت کی۔

انہوں نے کہا کہ بعض مرتبہ ایسے فیصلے بھی کرنے ہوں گے جو ذاتی طور پر پسند نہ ہوں لیکن وہ فیصلے پاکستان کے لیے بہتر ہوں گے، دورہ کراچی کا مقصد یہ پیغام دینا ہے کہ سب ایک ٹیم بن کر کام کریں گے۔

گزشتہ 4سال نئی اسکیمز میں وفاق نے سندھ کو نظر انداز کیا، وزیر اعلیٰ سندھ کا وزیراعظم سے شکوہ

وزیراعظم شہباز شریف کی زیر صدارت وزیراعلیٰ ہاؤس میں اجلاس ہوا۔

وزیراعظم کا کہنا تھا کہ 8 فروری کے الیکشن کے نتیجے میں وفاق میں منقسم مینڈیٹ ملا ہے، ہم سب کو ایک دوسرے کا ساتھ دینا ہوگا تاکہ عوام کے مسائل حل کرسکیں۔

شہباز شریف نے کہا کہ وزیراعلیٰ مراد علی شاہ سے بھائیوں والا تعلق بن گیا ہے، صوبوں کی ترقی پاکستان کی ترقی ہے، صوبے اور وفاق مل کر کام کریں گے تو سرمایہ کاری آئے گی، میرا فرض ہے اس حکومتی اتحاد کو مزید مضبوط بناؤں۔

ان کا کہنا تھا کہ آنے والے ہفتوں اور مہینوں میں مزید ممالک کے وفود آئیں گے، جمہوری ترقی کی گاڑی آگے بڑھے اس کیلئے ناپسند فیصلے بھی کرنے پڑیں گے۔

اس سے پہلے کراچی آمد پر وزیراعظم نے مزار قائد پر حاضری دی اور مختلف شعبوں میں نمایاں کارکردگی دکھانے والے نوجوانوں سے پاکستان کی خدمت اور ترقی میں اپنا کردار ادا کرنے کا حلف لیا۔