• بانی: میرخلیل الرحمٰن
  • گروپ چیف ایگزیکٹووایڈیٹرانچیف: میر شکیل الرحمٰن

اس ہفتے 18 اشیا سستی، 12 مہنگی ہوئیں، ادارہ شماریات

اشرف ملخم
تازہ ترین
تجارتی خبریں
24 مئی ، 2024
اس ہفتے 18 اشیا سستی، 12 مہنگی ہوئیں، ادارہ شماریات

ایک ہفتےکے دوران مہنگائی کی شرح صفر اعشاریہ 34 فیصد کم ہوگئی ہے، جس کے بعد ہفتہ وار بنیادوں پر مہنگائی کی سالانہ شرح 21 اعشاریہ 31 فیصد پر آ گئی ہے۔

گذشتہ ایک ہفتے کے دوران 18 اشیا سستی اور 12 مہنگی ہوئیں جبکہ 21 اشیا کی قیمتوں میں استحکام رہا۔

ادارہ شماریات کی طرف سے جاری کردہ ہفتہ وار بنیادوں پر مہنگائی کی رپورٹ کے مطابق رواں ہفتے کے دوران لہسن کی فی کلو قیمت میں 43 روپے 46 پیسے، چکن کی فی کلو قیمت میں 20 روپے 21 پیسے، آٹے کا 20 کلو کا تھیلا مزید 88 روپے 89 پیسے، ایل پی جی کا گھریلو سلنڈر 93 روپے 12 پیسے سستا ہوا۔

اسی طرح گزشتہ ایک ہفتے کے دوران پیاز کی فی کلو قیمت میں 1 روپے 97 پیسے اور انڈے فی درجن 3 روپے 53 پیسے سستے ہوئے۔

ایک ہفتے کے دوران باسمتی چاول، دال مسور، مونگ اور ٹماٹر سستی ہونے والی اشیا میں شامل ہیں۔

ایک ہفتے میں گائے کے گوشت کی فی کلو قیمت میں 4 روپے 62 پیسے، مٹن فی کلو 4 روپے 47 پیسے اور دہی فی کلو 1 روپے 23 پیسے مہنگا ہوا۔

گرم مصالحہ، گڑ، چائے کی پتی اور سگریٹ مہنگی ہونے والی اشیا میں شامل ہیں۔

رواں ہفتے کے دوران کوکنگ آئل، بجلی، پٹرولیم مصنوعات سمیت 21 اشیا کے دام مستحکم رہے۔

تجارتی خبریں سے مزید