وزیرِ اعظم نے دورہٗ چین پر جانے سے قبل عوام سے کیا گزارش کی؟

وزیرِ اعظم شہباز شریف نے کہا ہے کہ چین آج دنیا کی دوسری بڑی معاشی اور فوجی طاقت ہے، چین نے ہر مشکل وقت میں ایک بھائی کی طرح پاکستان کا ساتھ دیا۔

دورۂ چین روانگی سے قبل وزیرِ اعظم شہباز شریف نے میڈیا سے گفتگو کرتے ہوئے کہا کہ آج کا دورہ سی پیک کے فیز ٹو مرحلے کی نئی سمت متعین کرے گا، عوام سے گزارش ہے کہ ہمارے دورۂ چین کی کامیابی کے لیے دعا کریں۔

انہوں نے کہا کہ نواز شریف نے بطور وزیرِ اعظم سی پیک کے ذریعے 45 ارب ڈالر کی سرمایہ کاری کا اہتمام کیا، نواز شریف کے دور میں چین کے تعاون سے بجلی کے اندھیرے ختم ہوئے۔

شہباز شریف کا کہنا ہے کہ چین اور پاکستان کی لازوال دوستی ہے، چین پاکستان کا ایسا دوست ہے جس کی نظیر ملنا مشکل ہے، چین کے ساتھ پاکستان کا تعلق 75 سال پر محیط ہے، چینی صدر کی سوچ اور وژن کی بنیاد پر دنیا میں جنگوں کے خاتمے کی کوشش کی جارہی ہے۔

واضح رہے کہ وزیرِ اعظم شہباز شریف چین کے دورے پر روانہ ہو گئے، وہ وفاقی وزراء کے ساتھ لاہور سے روانہ ہوئے ہیں۔

وزیرِ اعظم شہباز شریف کا آج 4 جون سے شروع ہونے والا دورۂ چین 8 جون کو اختتام پزیر ہو گا۔

وزیرِ اعظم شہباز شریف چینی شہر شینزین کا دورہ 4 اور 5 جون کو جبکہ 6 سے 7 جون تک چین کے شہر بیجنگ کا دورہ کریں گے۔