زکریا یونیورسٹی وہاڑی سب کیمپس منصوبے پر کام تیزی سے جاری

ملتان(سٹاف رپورٹر)محکمہ ہائر ایجوکیشن پنجاب کے زیر نگرانی اربوں روپے کی لاگت سے ضلع وہاڑی میں زکریا یونیورسٹی کے سب کیمپس کے قیام، کالجز میں نئی بلڈنگ، بلاکس کی تعمیر، اپ گریڈیشن اور بنیادی سہولیات کی فراہمی کے لئے جاری منصوبوں پر کام تیزی سے جاری ہے، یہ بات ضلع وہاڑی کے سالانہ ترقیاتی پروگرام کے تحت ہائر ایجوکیشن کی مختلف سکیموں کی نشاندہی اور ان پر عمل درآمد کی رفتار کا جائزہ لینے کے لیے ملتان ڈویژن کے ڈائریکٹر کالجز، ڈپٹی ڈائریکٹر کالجز وہاڑی، پروجیکٹ ڈائریکٹر زکریا یونیورسٹی سب کیمپس وہاڑی اور ایگزیکٹو انجینئر بلڈنگ ضلع وہاڑی کے اجلاس میں سپیشل سیکرٹری ہائیر ایجوکیشن جنوبی پنجاب سرفراز احمد کو بریفنگ دیتے ہوئے بتائی گئی۔ اجلاس میں ایڈیشنل سیکرٹری عطاءالحق اور ڈی پی آئی (کالجز) جنوبی پنجاب ڈاکٹر فرید شریف فاروقی سمیت محکمہ ہائر ایجوکیشن کے متعلقہ افسران نے شرکت کی، اس موقع پر سپیشل سیکرٹری ہائیر ایجوکیشن جنوبی پنجاب کو ضلع وہاڑی میں ہائیر ایجوکیشن کے جاری و نئے منصوبوں، کالجز میں فنڈز کے استعمال اور دیگر معاملات کے بارے میں بریفنگ دی گئی۔ سپیشل سیکرٹری ایجوکیشن جنوبی پنجاب نے ہدایت کی کہ ہائر ایجوکیشن کی سکیموں پر کام کی رفتار، معیار اور شفافیت کی نگرانی کرنے کے لیے اقدامات پر عمل درآمد یقینی بنایا جائے۔