دریائے سین میں ہونیوالے مردوں کا اولمپک ٹرائیتھلون ملتوی کرنے کی وجہ سامنے آ گئی

30 جولائی ، 2024

فرانس کے دارالحکومت پیرس میں واقع دریائے سین کے پانی کا معیار بہتر نہ ہونے کی وجہ سے مردوں کا اولمپک ٹرائیتھلون ملتوی کر دیا گیا۔

غیر ملکی خبر رساں ایجنسی کے مطابق پیرس کے دریائے سین میں آج مردوں کے اولمپک ٹرائیتھلون کا انعقاد کیا جانا تھا جسے پانی کے معیار سے متعلق خدشات کے پیش نظر ملتوی کردیا گیا ہے۔

غیر ملکی میڈیا رپورٹس کے مطابق اولمپکس 2024ء کی انتظامیہ کا کہنا ہے کہ وہ بروز بدھ کو مردوں کے ٹرائیتھلون کے انعقاد کی کوشش کرے گی۔

واضح رہے کہ خواتین کا مقابلہ بھی بدھ، یعنی کہ کل شیڈول ہے لیکن دونوں، مردوں اور خواتین کے مقابلوں کا عمل میں آنا پانی کے ٹیسٹ سے مشروط ہے۔

میڈیا رپورٹس کے مطابق ٹرائیتھلون کے سوئمنگ ایونٹ کا ٹریننگ سیشن آج ہونا تھا جبکہ دریائے سین کے پانی کا معائنہ 27 جولائی کو کیا گیا تھا۔

پانی کے معائنے کے بعد ہی اولمپکس حکام نے ٹرائیتھلون کے لیے ٹریننگ سیشن اور تیراکی کے مقابلوں کو منسوخ کرنے کا فیصلہ کیا تھا۔

میڈیا رپورٹس کا یہ بھی کہنا ہے کہ رواں ماہ کے آغاز میں دریائے سین کے پانی کو صاف قرار دیا گیا تھا مگر افتتاحی تقریب کے انعقاد کے بعد دریا کا پانی آلودہ ہونا شروع ہوا ہے۔

اولمپکس انتظامیہ کا کہنا ہے کہ حالیہ بارش کے باعث دریائے سین کا پانی آلودہ ہوا ہے۔

کھیلوں کی خبریں سے مزید