سندھ ہائیکورٹ، ہاکس بے میں DHA کو زمین کی الاٹمنٹ سے متعلق پالیسی طلب

کراچی ( اسٹاف رپورٹر ) سندھ ہائی کورٹ نے ہاکس بے میں ڈی ایچ اے کو 6ہزار ایکڑ زمین کی مجوزہ الاٹمنٹ سے متعلق پالیسی طلب کرتے ہوئے سندھ حکومت کو ہدایت کی ہے کہ مذکورہ اراضی پر قائم تین دیہاتوں کے مکینوں کو بے دخل نہ کیا جائے اور آئی جی سندھ کو بھی پابند کیا ہے کہ گاؤں کے لوگوں کو ہراساں نہ کیا جائے، جسٹس صلاح الدین پہنور نے سندھ حکومت دیہاتوں کو ریگولرائز کرنے کی پالیسی بھی طلب کر لی ہے۔ عدالت نے آج ہونے والی سماعت کا تحریری حکم نامہ جاری کردیا۔ جسٹس صلاح الدین پنہور کی سربراہی میں دو رکنی بینچ کے روبرو کراچی کے علاقے ہاکس بے میں ڈی ایچ اے کو 6ہزار ایکڑ زمین دینے کیخلاف درخواست کی سماعت ہوئی۔ درخواستیں سندھ یونائیٹڈ پارٹی کے توسط سے دائر کی گئیں۔ عدالت نے وکلا سے استفسار کیا کہ یہ زمین کسی کی ہے آپکے ملکیت کے کیا ثبوت ہیں۔