بھارت نے اقلیتوں کے حقوق غصب کر رکھے ہیں: اسپیکر قومی اسمبلی ایاز صادق

اسپیکر قومی اسمبلی ایاز صادق نے کہا ہے کہ اقلیتوں کے قومی دن پر بھارت میں بسی اقلیتوں سے یک جہتی کا اظہار کرتے ہیں، بھارت نے اقلیتوں کے حقوق غصب کر رکھے ہیں۔

اقلیتوں کے قومی دن پر اپنے پیغام میں ایاز صادق نے کہا کہ ملک کی تعمیر و ترقی کے لیے اقلیتی برادری کا کردار قابلِ ستائش ہے، آئینِ پاکستان ملک کی تمام اقلیتوں کے حقوق کے تحفظ کی ضمانت دیتا ہے۔

انہوں نے کہا کہ اقلیتی برادری کے اراکین پارلیمنٹ قانون سازی میں بھرپور کردار ادا کر رہے ہیں، قائد اعظم نے 11 اگست1947ء کو ملک کی پہلی دستور ساز اسمبلی سے خطاب میں اقلیتوں کے حقوق کی ضرورت پر زور دیا تھا۔

اقلیتوں کا پاکستان کی ترقی و خوشحالی میں کلیدی کردار ہے: محسن نقوی

وفاقی وزیر داخلہ محسن نقوی کا کہنا ہے کہ اقلیتوں کا پاکستان کی ترقی و خوشحالی میں کلیدی کردار ہے۔

ایاز صادق کا کہنا ہے کہ پاکستان میں اقلیتی برادری کو اپنی عبادات، رسومات اور تہوار منانے کی مکمل آزادی حاصل ہے، پارلیمان میں اقلیتی برادری کو متناسب نمائندگی حاصل ہے، قائدِ اعظم کے فرمودات کے مطابق اقلیتوں کا تحفظ اجتماعی ذمے داری ہے۔

اسپیکر قومی اسمبلی نے کہا کہ اقلیتی برادری نے ہمیشہ ملک کی خاطر بے مثال قربانیاں دی ہیں۔

ان کا کہنا ہے کہ بھارت میں اقلیتوں کو مساوی حقوق حاصل نہیں ہیں، وہاں  اقلیتوں کو مذہبی عبادات سمیت دیگر رسومات منانے کی آزادی حاصل نہیں، بھارت اقلیتوں سے ناروا سلوک اور ان کے حقوق پامال کرنے والے ممالک میں شامل ہے۔