سواتی اور گوہر کو بلاکر جلسہ ملتوی کیا، ایک اور 9 مئی گلے ڈالنے کا خدشہ تھا، بانی پی ٹی آئی

بانی پاکستان تحریک انصاف (پی ٹی آئی) عمران خان نے کہا ہے کہ انہیں معلومات دی گئی تھیں کہ اسلام آباد میں دینی جماعتیں احتجاج کر رہی ہیں جس پر انتشار پھیلنے کا خدشہ ہے۔

اڈیالہ جیل میں صحافیوں سے گفتگو کرتے ہوئے بانی پی ٹی آئی نے کہا کہ انہوں نے اعظم سواتی اور بیرسٹر گوہر کو بلا کر ملاقات کی اور جلسہ ملتوی کیا، اگر ایسا نہیں کرتے تو خدشہ تھا ایک اور نیا 9 مئی بنا کر پی ٹی آئی کے گلے ڈال دیا جاتا۔

فیض حمید سے بیان دلوا کر مجھے ملٹری کورٹ لے جایا جائے گا، بانی پی ٹی آئی

بانی پی ٹی آئی نے کہا کہ ان کے خلاف سارے کیسز فارغ ہو چکے ہیں، اس لیے وہ اب انہیں ملٹری کورٹس کی طرف لے جانا چاہتے ہیں۔

 پی ٹی آئی بانی چیئرمین نے کہا کہ حکومت ایک طرف چیف جسٹس کی مدت ملازمت میں توسیع کی پلاننگ کر رہی ہے اور دوسری جانب عدالت میں سنیارٹی کو متاثر کرنے کی پلاننگ کی جارہی ہے۔

بانی پی ٹی آئی کا کہنا تھا کہ ن لیگ کو جب خدشہ ہوتا ہے ہماری اسٹیبلشمنٹ سے بات ہو رہی ہے تو انہیں 9 مئی یاد آتا ہے۔

انہوں نے یہ بھی کہا کہ وہ ملک کی سب سے بڑی جماعت کے سربراہ ہیں اسی لیے فیض حمید کے اوپن ٹرائل کا مطالبہ کررہے ہیں۔