بی جے پی اور آر ایس ایس کے اختلافات سامنے آگئے، حکمراں جماعت کے صدر کے بیان سے دراڑ پڑی

29 اگست ، 2024

بھارتی وزیراعظم نریندر مودی کی جماعت بی جے پی کی نظریاتی سرپرست ہندوتوا حامی آر ایس ایس سے اختلافات سامنے آگئے۔

بھارتی اخبار کے مطابق وزیراعظم نریندر مودی کو حالیہ انتخابات میں پارلیمںٹ میں اکثریت کھونے، بنگلادیش کی اتحادی حسینہ واجد حکومت ختم ہونے سے خارجہ پالیسی کو دھچکا لگنے کے بعد اب اپنی پارٹی اور ہندو قوم پرست تنظیم آر ایس ایس کے درمیان بڑھتی دوریوں جیسے بڑے چیلنج کا سامنا ہے۔

بھارتی اخبار لکھتا ہے کہ بی جے پی اور آر ایس ایس کے تعلقات میں دراڑ بی جے پی کے صدر کے بیان سے پڑی جس میں انہوں نے کہا کہ بی جے پی کو اب آر ایس ایس کی ضرورت نہیں رہی۔

یہ بھی پڑھیے

جواباً آر ایس ایس کے سربراہ نے مودی حکومت سے ریاست منی پور کو مستحکم کرنے کےلیے فوری کارروائی کا مطالبہ کر دیا جہاں مودی حکومت مہینوں بعد بھی امن و امان قائم کرنے میں ناکام رہی ہے۔

آر ایس ایس رہنماؤں نے پارلیمںٹ میں اکثریت نہ ملنے کو بی جے پی کے تکبر کی سزا بھی قرار دیا۔

بھارتی اخبار لکھتا ہے کہ مودی کو اقتدار میں رہنے اور آر ایس ایس کو ہندوتوا نظریے کے پھیلاؤ کو نقصان سے بچانے کےلیے ایک دوسرے کی ضرورت ہے اور یہی نظریہ ضرورت دونوں کو اختلافات بات چیت سے حل کرنے پر آمادہ کر رہا ہے۔

ان کوششوں کا نتیجہ آر ایس ایس کے 31 اگست سے 2 ستمبر کے درمیان ہونے والے سالانہ اجلاس کے بعد سامنے آنے کی توقع ہے۔

بین الاقوامی خبریں سے مزید