ٹیسٹ سیریز کے اختتام پر غیر ملکی کوچز آسٹریلیا روانہ ہونگے

03 ستمبر ، 2024

پاکستان اور بنگلا دیش کی ٹیسٹ سیریز کے اختتام پر قومی ٹیم کے غیر ملکی کوچز آسٹریلیا روانہ ہو جائیں گے۔

ذرائع کا کہنا ہے کہ ریڈ بال ہیڈ کوچ جیسن گلیسپی کی بنگلا دیش سے ٹیسٹ سیریز کے اختتام پر کل روانگی شیڈول ہے جبکہ ہائی پرفارمنس کوچ ٹم نیلسن بھی آسٹریلیا روانہ ہو جائیں گے، دونوں کوچز انگلینڈ کے خلاف سیریز کے لیے کیمپ سے قبل واپس آئیں گے۔

پاکستان اور انگلینڈ ٹیسٹ سیریز کا پہلا ٹیسٹ 7 اکتوبر سے ملتان میں شروع ہو گا، ٹیسٹ سیریز کے لیے کیمپ یکم اکتوبر سے شروع ہونے کا امکان ہے۔

ذرائع نے بتایا کہ فزیو کلف ڈیکن اور اسٹرنتھ اینڈ کنڈیشنگ کوچ ڈریکس سائمن پاکستان میں رہیں گے، دونوں قومی ٹیسٹ اسکواڈ اور دیگر انٹرنیشنل کھلاڑیوں کے فٹنس ٹیسٹ لیں گے، فٹنس ٹیسٹ کا سلسلہ چیمپئنز ون ڈے کپ سے قبل مکمل کیا جائے گا۔

وائٹ بال ہیڈ کوچ گیری کرسٹن چیمپئنز ون ڈے کپ کے دوران موجود ہوں گے، وہ ٹی ٹوئنٹی ورلڈ کپ کے بعد جنوبی افریقہ چلے گئے تھے جبکہ جولائی میں لاہور آئے تھے اور اپنا فیڈ بیک دیا تھا۔

چیمپئنز ون ڈے کپ کے دوران گیری کرسٹن کھلاڑیوں کو مانیٹر کریں گے، وہ مینٹورز کے ساتھ مل کر مستقبل کے لیے ٹیم کو تیار کریں گے۔

واضح رہے کہ وائٹ بال ٹیم کی اگلی اسائنمنٹ نومبر میں آسٹریلیا میں سیریز ہے۔

کھیلوں کی خبریں سے مزید