فرمان الہی
نماز کے اوقات
کراچی کے علاقے گلستان جوہر میں ملینئم مال کے قریب ڈاکوؤں نے ڈیڑھ کروڑ روپے لوٹنے کی کوشش کی تو موقع پر موجود افراد اور پولیس کی بروقت کارروائی سے رقم تو بچ گئی لیکن اس دوران ڈاکوؤں کی فائرنگ سے سیکیورٹی گارڈ اور ایک راہگیر جاں بحق ہوگئے، پولیس کے ساتھ فائرنگ کے تبادلے میں زخمی ہونے والا ڈاکو بھی دم توڑ گیا۔
پولیس کے مطابق مقامی بلڈر کا عملہ ڈیڑھ کروڑ روپے لے کر آرہا تھا کہ ملزمان نے فائرنگ کردی جس سے گاڑی میں سوار سیکیورٹی گارڈ مبین جاں بحق ہوگیا۔
فائرنگ کی آواز سن کر گشت پر مامور پولیس اہلکار بھی فوری پہنچ گئے اور ملزمان کی موٹر سائیکل کو ٹکر مار دی جس سے دو ملزمان زخمی ہوگئے جبکہ ایک ڈاکو پولیس پر فائرنگ کرتا ہوا قریبی شاپنگ مال میں چلا گیا، موقع پر موجود شہریوں نے بھی ڈاکوؤں کو تشدد کا نشانہ بنایا۔
بلڈر کے عملے کا کہنا ہے کہ کیش دوسرے آفس منتقل کیا جارہا تھا کہ ڈاکوؤں نے رقم چھیننے کی کوشش کی، جاں بحق ہونے والا سیکیورٹی گارڈ کافی عرصے سے ان کے ساتھ کام کررہا تھا۔
پولیس حکام کا کہنا ہے کہ ملزمان اس سے قبل بھی کئی وارداتیں کرچکے ہیں، انہوں نے گلستان جوہر میں بھی شہری کو ڈکیتی کے دوران قتل کردیا تھا۔
