ایشین ہاکی چیمپئنز ٹرافی: پاکستان 9 سیکنڈ قبل جیت سے محروم

ایشین ہاکی چیمپئنز شپ میں پاکستان اور کوریا کے درمیان میچ دو دو گول سے برابر ہو گیا۔

چین کے شہر ہولینبیور میں جاری ایشین ہاکی چیمپئنز ٹرافی میں پاکستان اور کوریا کے درمیان دلچسپ میچ ہوا، کوریا نے دوسرے ہی کوارٹر میں گول کر کے برتری قائم کی جو تیسرے کوارٹر تک برقار رہی۔

پاکستان ٹیم تیسرے کوارٹر تک کوئی گول نہ کرسکی تھی اور ایک گول سے ہار رہی تھی لیکن چوتھے کوارٹر میں پاکستان ٹیم نے شاندار کم بیک کیا اور حنان شاہد نے اوپر نیچے دو گول کر دیے۔

میچ کے اختتام سے صرف 9 سیکنڈز  قبل کوریا نے ایک اور گول کر کے مقابلہ برابر کر دیا۔

پاکستان ٹیم اب تک چیمپئنز ٹرافی میں کوئی کامیابی حاصل نہیں کر سکی ہے۔

گزشتہ روز بھی قومی ٹیم کا ملائیشیا کے خلاف میچ دو دو گول سے برابر ہوگیا تھا۔

پاکستان تیسرا میچ بدھ کو جاپان کے خلاف کھیلے گا۔