آئی ایم ایف کیساتھ معاملات خوش اسلوبی سے طے پاگئے، وزیر خزانہ

12 ستمبر ، 2024

رواں ماہ آئی ایم ایف کے بورڈ اجلاس میں ان معاملات کو حتمی شکل دے دی جائے گی، وزیر خزانہ محمد اورنگزیب - فوٹو: فائل

وزیر خزانہ محمد اورنگزیب نے کہا ہے کہ آئی ایم ایف کے ساتھ تمام معاملات خوش اسلوبی سے طے پاگئے ہیں۔

انٹرنیشنل مانیٹری فنڈ (آئی ایم ایف) معاہدے سے متعلق اپنے بیان میں وزیر خزانہ محمد اورنگزیب کا کہنا تھا کہ رواں ماہ آئی ایم ایف کے بورڈ اجلاس میں ان معاملات کو حتمی شکل دے دی جائے گی۔

انکا کہنا تھا کہ ملکی معیشت استحکام کے بعد ترقی کی جانب گامزن ہے۔ شرح سود میں کمی سے سرمایہ کاری اور کاروباری سرگرمیاں بڑھیں گی۔

وزیر خزانہ نے مزید کہا کہ معاشی سرگرمیاں بڑھنے سے روزگار کے مواقع پیدا ہونگے۔ مہنگائی میں مسلسل کمی کے رجحان سے عام آدمی کو ریلیف ملنا شروع ہوگیا۔

محمد اورنگزیب کا کہنا تھا کہ وزیرِاعظم کی ٹیم، آئی ایم ایف کی مذاکراتی ٹیم اور متعلقہ اداروں کے شکر گزار ہیں جنہوں نے حتمی مراحل میں کلیدی کردار ادا کیا۔

واضح رہے کہ آئی ایم ایف کے 7 ارب ڈالرز قرض کی راہ میں حائل رکاوٹیں دور ہوگئیں۔ اس سلسلے میں گورنر اسٹیٹ بینک کا کہنا تھا کہ آئی ایم ایف کے علاوہ بین الاقوامی نجی شعبے سے 2 ارب ڈالرز قرض کی یقین دہانیاں حاصل ہوگئیں۔

انہوں نے بتایا کہ آئی ایم ایف پروگرام کے حصول میں مزید کوئی رکاوٹ نہیں ہے۔ پاکستان ستمبر 2024 میں آئی ایم ایف اجلاس میں اپنا مقدمہ پیش کرے گا۔ پاکستان کو رواں مالی سال 26.20 ارب ڈالر ادا کرنے ہیں۔

تجارتی خبریں سے مزید