دھماکے اسرائیلی کارروائی ہیں، دشمن کو سزا ضرور دی جائے گی، حزب اللّٰہ

پیجر ڈیوائسز میں دھماکوں کے بعد حزب اللّٰہ نے بیان جاری کرتے ہوئے اسرائیل کو دھماکوں کا ذمہ دار قرار دے دیا۔ 

حزب اللّٰہ کا کہنا ہے کہ دھماکوں سے متعلق تمام حقائق اور معلومات کی جانچ کے بعد اسرائیل کو مکمل ذمہ دار ٹھہراتے ہیں۔

تنظیم نے کہا کہ شہریوں کو نشانہ بنانے والی اس مجرمانہ جارحیت کا مکمل ذمہ دار دشمن اسرائیل ہے۔ فلسطینیوں کی مزاحمت کی حمایت جاری رکھیں گے۔

لبنانی تنظیم کا کہنا تھا کہ غدار اور مجرم دشمن کو اس جارحانہ فعل کی سزا ضرور دی جائے گی۔ 

حسن نصراللّٰہ نے ڈیوائسز دھماکوں سے پہلے ہی خبردار کردیا تھا، رپورٹ

لبنان میں اسرائیل نے جدید ٹیکنالوجی کا استعمال کرتے ہوئے جیبوں میں موجود پیجر ڈیوائس کو ہیک کرکے دھماکے سے اڑادیا جس کے سبب سیکڑوں حزب اللہ ارکان زخمی ہوگئے۔

علاوہ ازیں بیان میں یہ بھی بتایا گیا کہ حزب اللّٰہ کے سربراہ حسن نصراللّٰہ پیجر دھماکوں میں محفوظ رہے ہیں۔

دوسری جانب غیر ملکی خبر ایجنسی سے گفتگو کرتے ہوئے ایک حزب اللّٰہ عہدیدار کا کہنا تھا کہ دھماکے گروپ کے مواصلاتی نظام کے خلاف اسرائیلی کارروائی ہے۔ 

حزب اللّٰہ عہدیدار نے کہا کہ تنظیم کے ارکان کے استعمال میں نئے ماڈل کے پیجر پہلے گرم ہوئے پھر پھٹ گئے۔ 

واضح رہے کہ لبنان میں حزب اللہ ارکان کے زیر استعمال پیجر ڈیوائسز دھماکوں سے پھٹ گئیں جن میں 9 افراد جاں بحق ہوگئے جبکہ 3 ہزار سے زائد افراد زخمی ہوگئے۔ 

پیجر کیا ہے اور اس میں دھماکا کیسے ہوسکتا ہے؟ نئے سوالات نے جنم لےلیا

لبنان میں منگل کو حزب اللہ کے ارکان کے زیر استعمال متعدد پیجرز میں دھماکے کے بعد یہ سوالات پیدا ہوئے کہ پیجر کیا ہے اور یہ کیونکر پھٹ سکتا ہے۔

عرب میڈیا کی رپورٹ کے مطابق اس واقعے میں زخمی کئی افراد کی حالت تشویش ناک ہے۔ 

دوسری جانب اقوام متحدہ نے لبنان میں پیجرز ڈیوائس دھماکوں پر اظہار تشویش کیا۔ 

اقوام متحدہ کے ترجمان نے کہا کہ لبنان میں پیش رفت انتہائی تشویشناک ہے۔ لبنان میں غیر مستحکم حالات پیدا کرنے کی پیش رفت پر تشویش ہے۔