فرمان الہی
نماز کے اوقات
نادیہ سیف
گھر ہی وہ مقام ہے کہ جہاں ہماری شخصیت کی بنیادیں رکھی جاتی ہیں اور یہی وہ جگہ ہے کہ جہاں مثبت عادات فروغ پاتی ہیں۔ ایک خوش حال اور مثبت ماحول میں پرورش پانے والے افراد نہ صرف دُنیاوی طور پر کام یاب ہوتے ہیں بلکہ روحانی اعتبار سے بھی ایک مطمئن زندگی گزارتے ہیں۔
بلاشُبہ، مثبت عادات کا فروغ گھر کے ہر فرد کی ذمّے داری ہے اور اس مقصد کے لیے کچھ اہم نکات ، اصولوں کو اپنانا ضروری ہے کہ محض دنیاوی کام یابیوں کے حصول ہی کے لیے نہیں، بہ حیثیتِ مسلمان دینی تعلیمات بھی ہم سے یہی تقاضا کرتی ہیں۔
مثبت عادات اور اخلاقیات کے ضمن میں ہمارے پیارے نبی حضرت محمدﷺ نے فرمایا کہ ’’تم میں سے بہترین وہ ہے، جس کے اخلاق سب سے اچّھے ہیں۔‘‘ (صحیح بخاری) یہ حدیث اسلامی تعلیمات میں اخلاقیات کی اہمیت اجاگر کرتی ہے۔
حضرت عائشہ صدیقہ رضی اللہ عنہا سے روایت ہے کہ ایک دن ایک شخص نبی کریم ﷺ سے ملنے آیا اور اس نے آپؐ سے پوچھا کہ ’’یا رسول اللہ! دین کیا ہے؟‘‘ تو آپ ﷺنے جواب دیا کہ ’’دین اچّھے اخلاق کا نام ہے۔‘‘
حُسنِ اخلاق کے ضمن میں حضرت انس بن مالک، جو نبیٔ کریم ﷺ کے خادم تھے، فرماتے ہیں کہ ’’مَیں نے نبی ٔ کریمﷺ کی دس سال خدمت کی اور اس دوران کبھی بھی آپؐ نے مجھ سے نہ تو کسی کام پر ناراضی ظاہر کی اور نہ ہی کسی کام کو غلط کہا۔‘‘ (صحیح مسلم) سیرتِ نبویؐ اور اسلامی تعلیمات میں ہمیں جا بہ جا حُسنِ اخلاق اور اچّھی عادات کی مثالیں ملتی ہیں اور ان ہی پر عمل پیرا ہو کر ہم ایک خوش حال معاشرہ تشکیل دے سکتے ہیں۔ ذیل میں مثبت عادات، اُن کی اہمیت و افادیت اور انہیں فروغ دینے کے کچھ طریقے پیش کیے جا رہے ہیں۔
مثبت عادات
ذہنی و جسمانی صحت کا خیال رکھنا: صحت مند افراد، معاشرے کے لیے بھی مفید ثابت ہوتے ہیں۔ اگر آپ ذہنی و جسمانی طور پر صحت مند رہنا چاہتے ہیں، تو رات جلدی سونے ، صبح سویرے بیدار ہونے، متوازن غذا کھانے اور باقاعدگی سے ورزش کرنے کی عادات اپنائیں۔
خوش گوار تعلقات: باہمی احترام و محبّت اور صبر و تحمّل جیسی عادات افراد کے درمیان خوش گوار تعلقات کو فروغ دیتی ہیں۔ نیز، یہی اطوار گھر کے ماحول کو خوش گوار اور پُر سکون بھی بناتےہیں۔
نظم و ضبط: مثبت عادات، زندگی میں نظم و ضبط اور توازن پیدا کرتی ہیں اور یہ دونوں خصوصیات ہی افراد کو اپنے مقاصد کے حصول میں مدد فراہم کرتی ہیں۔
مثبت عادات کے فروغ کے طریقے
مثال قائم کرنا : عام طور پر والدین ہی اپنے بچّوں کے رول ماڈلز ہوتے ہیں کہ بچّے بیش تر امورِ زندگی میں اپنے ماں باپ کی تقلید کرتے ہیں۔ لہٰذا، والدین کو چاہیے کہ وہ خود مثبت عادات اپنا کر اپنے بچّوں کے لیے مثال قائم کریں۔
تعریف اور حوصلہ افزائی: مثبت عادات کے فروغ میں بچّوں کی تعریف اور حوصلہ افزائی اہم کردار ادا کرتی ہے۔ لہٰذا، جب بچّے یا دیگر افراد کوئی مثبت عمل کریں، تو دل کھول کر ان کی تعریف اور حوصلہ افزائی کی جائے۔ یوں اچّھی عادات کو دوام ملے گا۔
مثبت عادات کو معمول بنانا : مثبت عادات کے فروغ کے لیے انہیں روزمرّہ معمولات کا حصّہ بنانا ضروری ہے۔ اس ضمن میں ایک منظّم روٹین ترتیب دیں، جس میں صحت بخش غذا کا استعمال، ورزش، مطالعے اور تفریح جیسے امور شامل ہوں۔
تربیتی سرگرمیاں: بچّوں کو اچّھی عادات کی جانب راغب کرنے کے لیے مختلف تربیتی سرگرمیوں کا اہتمام کریں، جن میں کہانیاں سنانا، مختلف اِن ڈور اور آؤٹ ڈور گیمز کا انعقاد اور تعلیمی سرگرمیاں وغیرہ شامل ہوں۔
مکالمہ اور بات چیت: خاندان کے افراد کے درمیان مکالمے اور بات چیت کا سلسلہ جاری رکھیں۔ مختلف مسائل اور اُن کے حل پر گفتگو کریں اور ایک دوسرے کی آراء سُنیں کہ یہ عمل بھی مثبت عادات کو فروغ دینے میں مددگار ثابت ہوتا ہے۔
گھر میں مثبت عادات کی مثالیں
مطالعے کی عادت: بچّوں کو مطالعے کی عادت ڈالیں کہ کتابیں پڑھنے سے نہ صرف ان کے علم میں اضافہ بلکہ ذہنی نشوونما بھی بہتر ہوگی۔
صفائی اور نظم و ضبط: صفائی اور نظم و ضبط کی عادت کو فروغ دیں۔ گھر کی صفائی میں سب کا حصّہ ہونا چاہیے تاکہ گھر کا ماحول خوش گوار رہے۔
باہمی احترام : باہمی احترام کی عادت اپنائیں۔ چاہے بچّے ہوں یا بزرگ، ہر فرد کو ایک دوسرے کا احترام کرنا چاہیے۔
وقت کی پابندی: وقت کی پابندی کریں۔ وقت پر سونا، اُٹھنا، کھانا کھانا اور دیگرامور انجام دینا نظم و ضبط کی نشانی ہے۔
مدد و تعاون: ایک دوسرے کی مدد اور تعاون کی عادت اپنائیں۔ خاندان کے افراد کو چاہیے کہ وہ ایک دوسرے کی مدد اور ایک دوسرے سے ہر ممکن تعاون کریں۔
گھر میں مثبت عادات کا فروغ ہی ایک خوش حال اور مطمئن زندگی کی کُنجی ہے۔ یہ عادات نہ صرف افراد کی ذہنی و جسمانی صحت بہتر کرتی ہیں بلکہ گھر کا ماحول بھی حسین و پُر سکون بناتی ہیں۔ والدین کی ذمّے داری ہے کہ وہ خود مثبت عادات کی مثال قائم کریں اور بچّوں میں بھی ان کی اہمیت و افادیت اجاگر کریں۔ یاد رہے کہ ایک آسودہ حال اور مسرور گھرانا ہی ایک بہترین معاشرے کی بنیاد ہوتا ہے۔
