مریم نواز کے حکم پر جیل میں بشریٰ بی بی کو تنگ کیا جا رہا ہے: بیرسٹر سیف کا الزام

مشیرِ اطلاعات خیبر پختون خوا بیرسٹر محمد علی سیف نے الزام عائد کیا ہے کہ مریم نواز کے احکامات پر جیل میں بشریٰ بی بی کو تنگ کیا جا رہا ہے۔

ایک بیان میں بیرسٹر محمد علی سیف نے کہا ہے کہ باپردہ خاتون کی کیمروں کے سامنے تلاشی لے کر تضحیک کی جا رہی ہے۔

اُنہوں نے بتایا کہ بشریٰ بی بی کو رات کو نیند سےجگا کر سیل کی تلاشی کے بہانے ذہنی اذیت دی جا رہی ہے یہاں تک کہ بالوں کی تلاشی بھی لی جا رہی ہے۔

نامکمل اور غیر آئینی پارلیمنٹ کو قانون سازی کا حق نہیں: بیرسٹر محمد علی سیف

مشیرِ اطلاعات خیبر پختون خوا بیرسٹر محمد علی سیف نے کہا ہے کہ 8 فروری سے اپوزیشن کا مؤقف رہا ہے کہ حکومت غیر منتخب اور غیر نمائندہ ہے، پارلیمنٹ نامکمل اور غیر آئینی ہے تو قانون سازی کا حق بھی نہیں۔

مشیرِ اطلاعات خیبرپختون خوا نے کہا کہ بشریٰ بی بی کے ذریعے بانیٔ پی ٹی آئی کو توڑنے کی کوشش کی جا رہی ہے لیکن بشریٰ بی بی ڈٹ کر خان صاحب کے ساتھ کھڑی ہیں اور ان کی طاقت بنی ہوئی ہیں۔

اُنہوں نے کہا کہ مریم نواز کی حکومت میں خواتین پر ظلم کے پہاڑ توڑے جا رہے ہیں۔

بیرسٹر سیف نے یہ بھی کہا کہ پشاور کی بزرگ خاتون کو بھی گرفتار کر کے پابندِ سلاسل کیا گیا، مریم نواز اتنا ظلم کریں کہ کل پھر برداشت بھی کر سکیں۔

اُنہوں نے کہا کہ ملک میں جو ہو رہا ہے، اس میں آئین کا احترام ضروری ہے، آئین پر عمل کیا جائے اور عوام کو ان کا حق دیا جائے تو ملک ترقی کی راہ پر گامزن ہوگا۔

مشیرِ اطلاعات خیبرپختون خوا نے کہا کہ جن ممالک نے اپنے پڑوسیوں کے ساتھ اچھے تعلقات قائم کیے وہ کامیاب ہوئے، پاک چین ثقافت کو فروغ دینا ملک کی ترقی میں کردار ادا کرتا ہے۔