کراچی: آج بھی آندھی و بارش کی پیشگوئی، ہوا کا کم دباؤ طوفان بننے کا امکان

کراچی میں آج بھی کہیں کہیں ہلکی بارش اور آندھی چلنے کا امکان ظاہر کیا گیا ہے۔

اس بات کی پیش گوئی چیف میٹرولوجسٹ سردار سرفراز نے ’جیو نیوز‘ سے گفتگو کے دوران کی ہے۔

ان کا کہنا ہے کہ بارشوں سے کراچی میں درجۂ حرارت پر زیادہ فرق نہیں پڑے گا، آج بھی کراچی میں درجۂ حرارت 40 ڈگری سینٹی گریڈ تک جا سکتا ہے۔

چیف میٹرولوجسٹ کا کہنا ہے کہ کراچی میں 20 اکتوبر کے بعد امکان ہے کہ درجۂ حرارت میں کمی ہو جائے۔

انہوں نے کہا ہے کہ شمالی علاقہ جات میں رات کا درجۂ حرارت سنگل ڈیجیٹ میں پہنچ گیا ہے۔

سردار سرفراز نے کہا ہے کہ بحیرۂ عرب کے جنوب مشرق میں ہوا کا کم دباؤ بن چکا ہے، آئندہ ایک سے دو روز کے دوران ہوا کا یہ کم دباؤ شدت اختیار کر کے ڈپریشن بن سکتا ہے۔

ان کا یہ بھی کہنا ہے کہ سازگار ماحول ملنے پر ڈپریشن سمندری طوفان بن سکتا ہے، مون سون کے بعد بننے والے سمندری طوفانوں کا زیادہ تر رخ عمان کی جانب رہتا ہے، پاکستان کی ساحلی پٹی کو فی الحال اس سسٹم سے کوئی خطرہ نہیں۔

واضح رہے کہ گزشتہ روز بھی کراچی کے کچھ علاقوں میں آندھی کے ساتھ بارش ہوئی تھی۔