جن کی گھروں میں کوئی نہیں سنتا وہ مجھے بتائیں گے کہ کیا کرنا ہے؟ شازل شوکت

21 اکتوبر ، 2024

**اداکارہ شازل شوکت ــــ فوٹو اسکرین گریب**

پاکستان شوبز انڈسٹری کی اُبھرتی ہوئی اداکارہ شازل شوکت نے انسٹا کمنٹس محدود کرنے کی وجہ بتا دی۔

شازل شوکت نے حال ہی میں ایک پوڈ کاسٹ میں شرکت کی جہاں اُنہوں نے اپنی نجی زندگی اور شوبز کیریئر کے بارے میں دلچسپ گفتگو کی۔

اداکارہ کو اکثر ہی سوشل میڈیا پر اپنے لباس کے انتخاب پر صارفین کی جانب سے شدید تنقید کا سامنا کرنا پڑتا ہے اور پچھلے کچھ عرصے سے اُنہوں نے اپنے انسٹا کمنٹس کو محدود کیا ہوا ہے۔

شازل شوکت نے پوڈ کاسٹ میں اس حوالے سے بات کرتے ہوئے کہا کہ میں نے 1 سال سے اپنے انسٹا کمنٹس کو محدود کیا ہوا ہے کیونکہ مجھے اپنے کام کے بارے میں کسی کی رائے کی ضرورت نہیں ہے۔

اُنہوں نے کہا کہ مجھے خود یہ بات اچھی طرح پتہ ہے کہ میں کیا کر رہی ہوں۔

اداکارہ نے کہا کہ ایسے لوگ جو اپنے گھروں میں بیٹھے ہیں اور سوشل میڈیا پر جعلی اکاؤنٹس بنائے ہوئے ہیں جن پر ان کے صرف 2 یا 3 فالوورز ہوتے ہیں وہ مجھے بتائیں گے کہ مجھے کیا کرنا ہے۔

اُنہوں نے کہا کہ ان لوگوں نے شاید اپنے گھروں سے نکل کر دنیا بالکل نہیں دیکھی ہے لیکن میں نے دیکھی ہے تو میں نے جتنی دنیا دیکھی ہے میں اپنے تجربے کے حساب سے کام کرتی ہوں۔

شازل شوکت نے کہا کہ وہ لوگ جن کی ان کے اپنے گھروں میں کوئی نہیں سنتا وہ مجھ جیسے لوگوں کی پروفائل پر کمنٹس صرف دوسروں کی توجہ حاصل کرنے کے لیے کرتے ہیں لیکن معذرت کے ساتھ میں ایسے لوگوں کو بالکل توجہ نہیں دے سکتی۔

انٹرٹینمنٹ سے مزید