فرمان الہی
نماز کے اوقات
سکھر (بیورو رپورٹ) گدپور کے کچے کے علاقے میں پولیس اور ڈاکوؤں کے درمیان مقابلہ، فائرنگ کے تبادلہ میں ایک پولیس اہلکار شہید، دوسرا زخمی ہوگیا۔ اطلاعات کے مطابق ڈاکوؤں کے گروہ نے گدپور تھانہ کی حدود سرگومو کے قریب پولیس چوکی پر حملہ کیا، ڈاکوؤں کی گولیوں کی زد میں آکر ایک پولیس اہلکار اربیلو چاچڑ زندگی کی بازی ہار گیا جبکہ دوسرا اہلکار رضا محمد مگسی زخمی ہوگیا، اطلاع ملنے پر سدھوجہ، پنوعاقل، بائجی ودیگر تھانوں کی بھاری پولیس نفری پہنچ گئی۔ بعد ازاں شہید پولیس اہلکار کی نماز جنازہ پولیس لائن ہیڈ کوارٹر سکھر میں ادا کی گئی، ڈی آئی جی سکھر فیصل عبداللہ، ایس ایس پی امجد احمد شیخ، سیکٹر ونگ کمانڈر بریگیڈیئر ندیم سمیت پولیس افسران، صحافیوں، سیاسی، سماجی تنظیموں کے نمائندوں نے شرکت کی۔ شہید اہلکار کے جسد خاکی کو قومی پرچم میں لپیٹا گیا، پولیس کے دستے نے سلامی پیش کی، آبائی گاؤں کے قبرستان میں سپرد خاک کردیا گیا۔
