فرمان الہی
نماز کے اوقات
تحریک انصاف کے رہنما اور کے پی حکومت کے مشیر اطلاعات بیرسٹر محمد علی سیف نے کہا ہے کہ مراد سعید اسلام آباد میں آیا تو گرفتار کرلیتے۔
ترجمان خیبر پختونخوا حکومت بیرسٹر سیف نے وزیرِ اطلاعات عطا تارڑ کی پریس کانفرنس پر ردِ عمل دیتے ہوئے کہا کہ پوری دنیا نے دیکھا کس طرح گولیاں چلائی گئیں، کارکنوں کے ہاتھوں میں ڈنڈے تھے، اسلحہ نہیں تھا۔
جیو نیوز کے پروگرام نیا پاکستان میں گفتگو کرتے ہوئے انہوں نے کہا کہ عطا اللّٰہ تارڑ کے بیان کی کوئی اہمیت نہیں، ایک طرف سے گولیاں چلائی گئیں اور جھوٹ بولا جا رہا ہے۔
بیرسٹر سیف نے کہا مراد سعید انکو نظر آئے تو انکو پکڑ لیتے، مراد سعید اسلام آباد میں آیا تو گرفتار کرلیتے۔ مراد سعید میرے خیال میں وہاں نہیں تھے۔
انہوں نے عطا تارڑ کو پیشکش کی کہ وزیراعلیٰ ہاؤس میں آئیں دیکھ لیں مراد سعید موجود ہے یا نہیں۔
کے پی حکومت کے مشیر اطلاعات کا کہنا تھا کہ بانی پی ٹی آئی کو کہا ان حالات میں ڈی چوک پر جانا مناسب نہیں، حکومت نے ہمیں کہا کہ سنگجانی میں احتجاج کرلیں، بانی پی ٹی آئی نے ہمیں سنگجانی میں احتجاج کی اجازت دی۔
بیرسٹر سیف کا کہنا تھا کہ جو بھی فیصلہ تھا وہ حالات کے مطابق کیا گیا، بشریٰ بی بی سے متعلق کسی نے کچھ کہا تو انکو پتا ہوگا۔
انہوں نے کہا کہ میری اور بیرسٹر گوہر علی خان کی بانی پی ٹی آئی سے بات ہوئی، میں نے علی امین سے بات کی، انہیں بتایا دیا جو ہمیں بانی پی ٹی آئی نے کہا۔ رات کو بانی پی ٹی آئی نے بھی علی امین گنڈاپور کو بتا دیا تھا، فائرنگ کی گئی۔
بیرسٹر سیف نے کہا کہ کیمیکل پھینکے گئے، بلٹ پروف گاڑیوں کی وجہ سے بچت ہوئی، علی امین گنڈاپور پر پوری پارٹی کا اعتماد ہے۔
بیرسٹر سیف نے کہا کہ ہماری پارٹی میں خلیج نہیں۔ بشریٰ بی بی بانی کی اہلیہ ہیں انکا احترام ہے۔ بانی پی ٹی آئی جیل میں ہی تھے، کہیں نہیں گئے تھے۔
انہوں نے کہا کہ کرم میں واقعات ضرور ہوئے ہیں، فوری جنگ بندی بھی کی گئی، وزیر اعلیٰ نے کرم جرگے کے نمائندے سے بات کی، آج بھی ہم نے قبائلی وفد سے بات کی اور اعتماد دلایا گیا۔
