فرمان الہی
نماز کے اوقات
اسلام آباد (فاروق اقدس) مصدقہ ذرائع سے معلوم ہوا ہے کہ دہلی میں پاکستانی ہائی کمیشن نے 18 سال سے بھارتی جیلوں میں قید کراچی سے تعلق رکھنے والے پاکستانی شہری محمد فہد کی رہائی کے بعد وطن واپسی کیلئے بھارتی وزارت خارجہ سے باضابطہ رابطہ کرلیا ہے۔ اس ضمن میں موصولہ اطلاعات کے مطابق کراچی کے نارتھ ناظم آباد کا نوجوان محمد فہد 2006 میں جب اس کی عمر تقریباً 24 سال تھی گریجویشن کے بعد اپنی بوڑھی دادی سے ملنے کی خواہش وزٹ ویزے پر بھارت لے گئی تھی۔ جہاں اسے مشکوک شخص قرار دے کر گرفتار کرلیا گیا تھا اور وہ 18سال تک ہندوستان کی مختلف جیلوں میں ایک بیگناہ قیدی کی حیثیت سے جیل کی اذیتیں برداشت کرتا رہا تاہم کرناٹک ہائیکورٹ نے نومبر میں پاکستانی شہری کو ریلیز کرنے کا حکم دیا تھا۔ پاکستانی ہائی کمیشن ذرائع کے مطابق بھارتی وزارت خارجہ سے ریلیز آرڈر کا انتظار ہے، ریلیز آرڈر ملتے ہی فہد کے سفری دستاویزات تیار کرلیے جائیں گے۔ ذرائع کا کہنا تھا کہ پاکستانی ہائی کمیشن فہد کی وطن واپسی میں مکمل مدد کرے گا، محمد فہد 18 سال بھارتی جیلوں میں رہ کرگزشہ ماہ عدالت سے باعزت بری ہوا ہے۔ محمد فہد کا میڈیا سے گفتگو میں کہنا تھا کہ حکومت سے اپیل ہے کہ میرے سفری دستاویزات بنادے تا کہ میں وطن واپس آسکوں۔
