فرمان الہی
نماز کے اوقات
کرکٹ کے دیوانوں کیلئے بڑی خوشخبری! دُنیا کی 8 بہترین ٹیمیں آئی سی سی چیمپئنز ٹرافی 2025 میں ایک دوسرے کے خلاف نبردآزما ہوں گی، جہاں سب کی نظریں صرف ایک ٹرافی پر ہوں گی۔
پاکستان کی میزبانی میں ہونے والے اس شاندار ٹورنامنٹ کا آغاز 19 فروری کو کراچی کے نیشنل اسٹیڈیم میں ہوگا، جہاں پاکستان اور نیوزی لینڈ کے درمیان افتتاحی میچ کھیلا جائے گا۔
پاکستان کا پہلا نجی اسپورٹس چینل ”جیو سوپر“ شائقین کرکٹ کیلئے تمام سنسنی خیز مقابلے براہ راست نشر کرے گا۔
اس ٹورنامنٹ میں پاکستان، بھارت، آسٹریلیا، انگلینڈ، جنوبی افریقہ، بنگلادیش، افغانستان اور نیوزی لینڈ کی ٹیمیں شرکت کریں گی۔
ہر ٹیم کی کوشش ہوگی کہ وہ چیمپئنز ٹرافی کی دوڑ میں سب سے آگے نکلے اور کرکٹ کی دنیا پر حکمرانی کرے۔
سب سے زیادہ انتظار کیے جانے والا میچ، روایتی حریف پاکستان اور بھارت کے درمیان 23 فروری کو دبئی میں ہوگا، جس کےلیے شائقین ابھی سے بےتاب نظر آ رہے ہیں۔
”جیوسوپر“ کے ساتھ ساتھ ”جیو نیوز“ نے بھی اس ایونٹ میں تڑکہ لگانے کیلئے ماہرین کا پینل تشکیل دے دیا ہے جس میں سابق کپتان راشد لطیف، فاسٹ بولر محمد عامر، جارحانہ بلے باز احمد شہزاد اور کرکٹ تجزیہ کار سکندر بخت شامل ہوں گے جو شائقین کو کرکٹ کے ہر لمحے سے باخبر رکھیں گے۔
اس ایونٹ کے مقابلوں پر ناظرین کو ناصرف کرکٹ کے ہر مقابلے کی گہری تجزیاتی رپورٹ دی جائے گی بلکہ کھلاڑیوں کی کارکردگی، میچ کی حکمت عملی اور ہر اہم لمحے پر ماہرین کی رائے بھی پیش کریں گے۔
ان میچز کے دوران جہاں بہترین بیٹنگ، بولنگ اور فیلڈنگ دیکھنے کو ملے گی، وہیں کچھ غیر متوقع لمحات اور سنسنی خیز مقابلے بھی شائقین کے جوش و خروش کو مزید بڑھا دیں گے۔
اُمید کی جارہی ہے کہ یہ ٹورنامنٹ ناصرف پاکستان بلکہ دُنیا بھر میں کرکٹ کے شائقین کیلئے ایک یادگار ایونٹ ثابت ہوگا جہاں ہر گیند، ہر چوکے اور ہر چھکے پر کرکٹ دیوانوں کی دھڑکنیں تیز ہوں گی۔
