فرمان الہی
نماز کے اوقات
سعودی شوریٰ کونسل کے رکن یوسف بن طراد السعدون نے کہا ہے کہ ٹرمپ امن کے علمبردار بننا چاہتے ہیں تو اسرائیلیوں کو الاسکا منتقل کریں۔
مقامی اخبار اپنے مضمون میں یوسف بن طراد السعدون نے لکھا کہ امریکی صدر ٹرمپ اسرائیلیوں کو الحاق کے بعد گرین لینڈ میں بھی آباد کر سکتے ہیں۔
رکن سعودی شوریٰ کونسل نے کہا کہ ٹرمپ کی مشرق وسطیٰ سے متعلق پالیسیاں احمقانہ، غیر منطقی اور یکطرفہ ہیں، صہیونی اور اتحادی سعودی عرب پر اسرائیل سے مذاکرات کےلیے دباؤ ڈالنا چاہتے ہیں۔
السعدون کے مطابق انسانی تاریخ یہودیوں کی فتنہ پروری اور سازشوں سے واقف ہے۔
رکن سعودی شوریٰ کونسل نے کہا کہ تیرہویں اور سولہویں صدی میں یورپی ممالک نے یہودیوں کو ملک بدر کیا، امریکی پالیسی میں غیرقانونی قبضہ اور مقامیوں کی نسل کشی شامل ہے۔
انھوں نے کہا کہ غزہ کے فلسطینیوں کو عرب ممالک بھیجنے کی تجویز اسرائیل کے موقف سے مماثل ہے۔ بین الاقوامی قانون کے تحت یہ انسانیت کے خلاف جرائم تصور کیے جاتے ہیں، فلسطینیوں کو اپنی سرزمین سے بےدخلی کا منصوبہ صہیونی طبقے نے تیار کیا تھا۔
السعدون نے کہا کہ اس کےلیے وائٹ ہاؤس کا ڈائس شرمناک طریقے سے استعمال کیا گیا، مسئلہ فلسطین اور فلسطینیوں کے حقوق پر سعودی موقف میں کوئی تبدیلی آئی، نہ ہی آئے گی۔
واضح رہے کہ امریکی صدر ڈونلڈ ٹرمپ رواں ہفتے ایک بیان کہا تھا کہ میرے منصوبے کے مطابق جنگ کے خاتمے کے بعد اسرائیل کے ذریعے غزہ کی پٹی امریکا کے حوالے کر دی جائے گی۔
سوشل میڈیا پر اپنے بیان میں انھوں نے کہا کہ امریکا آہستگی اور احتیاط سے غزہ کی تعمیر شروع کرے گا، غزہ تعمیر نو اپنی نوعیت کی سب سے عظیم اور سب سے شاندار پیش رفت میں سے ایک بن جائے گی۔
