گھر میں جدید اور منفرد ڈریسنگ روم کی تعمیر

گھر میں جدید اور منفرد ڈریسنگ روم کی تعمیر ہر کسی کی خواہش ہوتی ہے کیونکہ یہ کسی بھی گھر کی ایک اہم ضرورت ہے۔ اس کی بنیادی وجہ یہ ہے کہ سجنا سنورنا انسان کی فطرت میں ہے۔ مرد ہو یا عورت ، ہر کوئی اس کے لیے وقت نکالتا ہے تاکہ وہ دوسروں سے نمایاں لگے۔ سجنے سنورنے اور گرومنگ کیلئے جگہ بھی درکا ر ہوتی ہے۔ عموماً ہمارے گھر وں میں ڈریسنگ روم اور کپڑوں کی الماری بیڈ روم کا حصہ ہوتی ہے۔ 

بیڈ کی سائیڈ پر یا سامنے ایک قد آور آئینہ لگا ہوتاہے ، جس کے سامنے بیٹھ کر خاتون خانہ تیار ہوتی ہیں۔ لیکن اگر آپ کا گھر کشادہ ہے تو آ پ ڈریسنگ روم بنواسکتے ہیں اور اس کو اپنے گھر اور ذوق کے مطابق ڈیزائن کرسکتے ہیں۔ انٹیریئر ماہرین کے نزدیک گھر کے دیگر حصوں کی طرح ڈریسنگ روم کو منظم اور خوبصورت انداز سے ترتیب دینا بھی اہم کام ہے، جس کےلیے مختلف آئیڈیاز کو ذہن میں رکھنا ضروری ہے۔

اگر دو تین فیملیز ساتھ رہتی ہوں تو دوران تعمیرسہولت کے پیش نظر مشترکہ ڈریسنگ روم کی تعمیر پر زور دیں۔ اس کے برعکس گھر کے تمام افراد کے لیے بیڈروم سے منسلک یا الگ ڈریسنگ روم کا بھی انتخاب کیا جاسکتا ہے۔

اگر آپ بیڈروم سے منسلک ڈریسنگ روم کی تعمیر کا خیال رکھتے ہیں تو اس کے لیے بڑی جگہ درکار ہوگی، بصورت دیگر بیڈ روم میں باتھ روم اور ڈریسنگ روم اچھی خاصی جگہ گھیرلیں گے اور آپ کی خواب گاہ تنگ محسوس ہوگی۔اس صورتحال سے نمٹنے کے لیے بیڈروم اور ڈریسنگ روم کا خیال ذہن میں رکھتے ہوئے جگہ تقسیم کریں۔ اس سلسلے میں ہم آپ کی کچھ رہنمائی کرسکتے ہیں۔

منصوبہ بندی

گھر کے کسی بھی حصے کی تعمیر ہو یا پھر تزئین نو، ضروریات کو ذہن میں رکھتے ہوئے سب سے پہلے منصوبہ بندی پر غور کریں۔ مثلاً یہ دیکھیں کہ آپ کی ضروریات کیا ہیں؟ اگر آپ مکان تعمیر کروارہے ہیں تو کیا آپ کے پاس اتنی جگہ موجود ہے کہ علیحدہ ڈریسنگ روم بنوایا جاسکے اور اگر گھر کی تزئین نو کر رہے ہیں تو پھر ڈریسنگ روم کیسے بنایا جائے گا؟ مکان کی تعمیر میں نقشہ سازی کے وقت آپ انجینئر سے بات کرکے ڈریسنگ روم کے لیے جگہ حاصل کرسکتے ہیں۔ 

وہ ڈریسنگ روم کو ذہن میں رکھتے ہوئے یقیناً جگہ نکال لے گا۔ تاہم، مسئلہ تزئین نو کے وقت آتا ہے، تاہم اس کا حل یہ ہے کہ اگر آپ کے گھر میں کوئی اضافی کمرہ موجود ہے تو آپ اس کو ڈریسنگ روم کے طور پر استعمال کر سکتے ہیں۔ آپ اس میں اپنے مزاج کے مطابق الماری بنوائیں، ایک قد آور آئینہ اور لائٹس لگوائیں۔ ہرحصے کو الگ رکھیں اورسائیڈ پر مزید سامان رکھنے کے لیے شیلف بھی بنوائیں۔

نفیس و باذوق

خوبصورتی نفاست میں چھپی ہوتی ہے۔ اگر آپ نفاست پسند ہیں تو ایک خوبصورت ڈریسنگ روم تیار کرنے میں کامیاب ہو جائیں گے۔ اس کیلئے کمرے میں لکڑی کے بجائے آپ شفاف شیشے کا استعمال کر سکتے ہیں۔ کمرے کے درمیان ایک خوبصورت سا روشنی کا گلوب لگاسکتے ہیں، جو کمرے میں روشنی بکھیرنے کے ساتھ ساتھ اسٹائلش بھی لگے گا۔ 

الماری میں الگ الگ خانے بنے ہوں تو چیزوں کی ترتیب میں آسانی ہوتی ہے۔ آپ مزید اسٹوریج کے لیے الماری کے نیچے درازیں بھی بنوا سکتے ہیں، جس میں جیولری یا جوتے وغیرہ رکھے جاسکتے ہیں۔ یہ ان لوگوں کے لیے بہترین ہے، جو ہر چیز کو ترتیب سے رکھتے ہیں۔

کشادہ الماری

اگر آپ بھی ان چند خوش قسمت لوگوں میں سے ہیں جن کے پاس ایک کشادہ کمرہ ہے تو لکڑی سے ایک بڑی الماری بنائی جا سکتی ہے۔ اس میں اوپر اور نیچے خانے بنائے جاسکتے ہیں جبکہ کمرے میں روشنی کے لیے ایک بڑی سی لائٹ لگائی جا سکتی ہے، جو کہ کمرے کو روشن رکھتی ہے۔

سلائیڈنگ دروازے

الماری کی اسٹوریج بڑھانے کیلئے سلائیڈنگ دروازے عمدگی سے کام کرتے ہیں۔ الماری کے دروازے سلائیڈنگ ہونے سے یہ ایک کمرے کا گمان دیتی ہے۔ کمرے میں جو بھی رنگ ہو لیکن الماری پر آپ سرخ یا عنابی رنگ کریں گے تو بہترین نتائج آپ کے سامنے ہوں گے۔

عارضی سیٹ اَپ

کمرے کے اندر ایک عارضی سیٹ اَپ بھی لگایا جاسکتا ہے۔ یہ ڈیزائن مرصع اور سادہ بھی ہوسکتا ہے ، اسٹائلش اور پریکٹیکل بھی۔ اس میں ایک ہینگنگ اسپیس اور جوتوں کے لیے شیلف بنائی جاسکتی ہے۔ آپ جب چاہیں اس میں تیار ہو سکتے ہیں۔

زینے کے نیچے

عموماً ہر گھر میں سیڑھیوں کے نیچے جگہ خالی ہوتی ہے، اس کو آپ بہترین طور پر استعمال کر سکتے ہیں۔ نیچے آپ درازیں بنا سکتے ہیں اور ان درازوں کی سائیڈ پر ہینگنگ اسپیس تیار کرسکتے ہیں۔ یوں آپ کا بہترین ڈریسنگ روم تیار ہوجائے تو آپ اس میں اضافی روشنیاں لگا سکتے ہیں، جس سے یہ وسیع لگے گا۔

شو ریک

اگر آپ کو بدل بدل کر جوتے پہننے کا شوق ہے اور آپ کے پاس لاتعداد جوتے ہیں توشور یکس کے بھی خوبصورت ڈیزائنز مارکیٹ میں دستیاب ہیں یا پھر آپ اپنے ذوق کے مطابق انھیں ڈیزائن کرسکتے ہیں۔ یہ شوریکس اگر لکڑی کے ہوں تو زیادہ دلکش محسوس ہوں گے۔

کھلی جگہیں

کھلی جگہ کی اپنی ایک الگ کشش ہوتی ہے۔ آپ اس میں جو چاہیں کرسکتے ہیں، جیسے ہینگنگ اسپیس بناسکتے ہیں یا ڈریسنگ ٹیبل کے دلکش اسٹائل کا انتخاب کرسکتے ہیں۔