فرمان الہی
نماز کے اوقات
لاہور کے قذافی اسٹیڈیم میں آسٹریلیا اور انگلینڈ کے درمیان ہونے والے میچ کے دوران کچھ لمحات کےلیے بھارتی ترانہ بجنے پر پاکستان کرکٹ بورڈ (پی سی بی) نے انٹرنیشنل کرکٹ کونسل (آئی سی سی) سے وضاحت طلب کرلی۔
ذرائع نے بتایا کہ چیمپئنز ٹرافی کےلیے ترانے کی پلے لسٹ آئی سی سی نے تیار کی تھی۔ بھارت کے پاکستان میں نہ ہونے کے باوجود بھی آئی سی سی نے پلے لسٹ میں بھارتی ترانہ رکھا۔
ذرائع کا کہنا تھا کہ انگلینڈ اور آسٹریلیا کے درمیان میچ میں ترانہ چلانا آئی سی سی کی ذمہ داری تھی۔ پاکستان کرکٹ بورڈ نے اس معاملے پر آئی سی سی سے رابطہ کرکے معاملے کی وضاحت طلب کرلی۔
پی سی بی نے آئی سی سی سے مطالبہ کیا کہ ناصرف پاکستان بلکہ ہر کسی کو اس غلطی پر وضاحت دی جائے۔ آئی سی سی کا ٹورنامنٹ ہے، ہر چیز کو کنٹرول کرنا اور چلانا آئی سی سی کی ذمہ داری ہے۔
خیال رہے کہ آسٹریلیا اور انگلینڈ کے میچ سے قبل آسٹریلیا کے قومی ترانے کی بجائے چند لمحے کےلیے بھارتی ترانہ چلا دیا گیا تھا۔
