فرمان الہی
نماز کے اوقات
پاکستان تحریک انصاف (پی ٹی آئی) کے سیکریٹری جنرل سلمان اکرم راجہ نے کہا ہے کہ جیل کا نظام نادیدہ قوتوں کے طابع ہے۔ چیف جسٹس کو جیل معاملات پر خط لکھوں گا۔
بانی پی ٹی آئی عمران خان سے ملاقات کے بعد راولپنڈی کی اڈیالہ جیل کے باہر میڈیا سے گفتگو کرتے ہوئے سیکریٹری جنرل پی ٹی آئی کا کہنا تھا کہ بانی پی ٹی آئی سے طویل وقفے کے بعد ملاقات ہوئی ہے۔
انہوں نے بتایا کہ ہمیں تشویش تھی لیکن بانی پی ٹی آئی کی صحت بالکل ٹھیک ہے۔
سلمان اکرم راجہ کا کہنا تھا کہ بانی نے کہا ہے جیل کا نظام نادیدہ قوتوں کے طابع ہے۔ بانی پی ٹی آئی نے کہا چھ ماہ میں چوتھی مرتبہ بچوں سے بات کرائی گئی۔ چیف جسٹس کو جیل معاملات پر خط لکھوں گا۔
سلمان اکرم راجہ کا کہنا تھا کہ ہم نے سندھ کے دورے پر بانی پی ٹی آئی کو بریف کیا ہے، بانی نے کہا سندھ کے حقوق کےلیے پی ٹی آئی لڑے گی۔
سیکریٹری جنرل پی ٹی آئی نے بتایا کہ بانی نے کہا ہم عوام کیلئے سیاست کر رہے ہیں، پنجاب میں ہر روز فسطائیت کا نیا واقعہ سامنے آرہا ہے، عوام کی ہم پر نظر ہے۔
سلمان اکرم راجا کا کہنا تھا کہ بانی پی ٹی آئی نے انتظامی معاملات پر کچھ ہدایات جاری کی ہیں، بانی نے کہا ہے کہ پارٹی کے جو لوگ حکومتی عہدوں پر ہیں وہ پارٹی عہدہ چھوڑ دیں۔
انہوں نے بتایا کہ بانی پی ٹی آئی کی اجازت سے ہی ہم چیف جسٹس سے ملے تھے، بانی نے کہا ہے چیف جسٹس کے سامنے صورتحال رکھی جائے۔
سلمان اکرم راجہ نے کہا کہ بانی پی ٹی آئی کرکٹ کی صورتحال پر افسردہ تھے، بانی پی ٹی آئی نے کہا ہے کرکٹ کو تباہ کردیا گیا ہے، کرکٹ ناتجربہ کار لوگوں کے حوالے کی گئی ہے۔
سلمان اکرم راجہ کا کہنا تھا کہ کرکٹ کے ساتھ پاکستان کے عوام کی وابستگی ہے، پچھلے چند سالوں میں کرکٹ کو مذاق بنا دیا گیا۔ ہم پاکستان کے اسٹیک ہولڈر ہیں ہم ہر ادارے کا دروازہ کھٹکھٹائیں گے۔
انکا کہنا تھا کہ جن لوگوں نے 26ویں ترمیم کے حق میں ووٹ ڈالا ان کی تو پارٹی میں کوئی گنجائش نہیں، جو لوگ 26ویں ترمیم میں غائب تھے یا رابطے میں نہیں تھے ان کے متعلق فرداً فرداً فیصلہ ہوگا۔
پی ٹی آئی سیکریٹری جنرل نے بتایا کہ شیر افضل مروت پارٹی سے باہر ہیں، یہ فیصلہ برقرار ہے۔
انہوں نے کہا کہ وزیراعلیٰ خیبر پختونخوا بانی پی ٹی آئی کی ہدایات کے مطابق فرائض انجام دے رہے ہیں۔ پاکستان تحریک انصاف متحد ہے۔
