فرمان الہی
نماز کے اوقات
دروازہ چاہے اندرونی ہو یا بیرونی، کسی بھی عمارت اور اس کی تعمیر کا اہم اور بنیادی لوازمات میں سے ایک ہوتا ہے۔ دروازے کےبے شمار فوائدہوتے ہیں اور اس کی اہمیت ہر اس انسان کو بخوبی پتہ ہوگی، جس کے گھر میں کسی بھی قسم کا کوئی قیمتی سامان موجود ہو۔ یہ کسی بھی جگہ، انسان یا سامان کو حفاظت فراہم کرتا ہے۔ اور اگر یہ اہم چیز خوبصورت بھی ہو تو اس کا فائدہ اور دلکشی دُگنی ہوجاتی ہے۔
دروازوں کا انتخاب فن تعمیرکی ترقی کے ساتھ، بذات خود فن کی صورت اختیار کرچکا ہے۔ اپنے بجٹ کے اندر رہتے ہوئے موزوں، پائیداراور خوبصورت دروازوں کا انتخاب ایک مشکل اور وقت طلب معاملہ ہوتا ہے۔ ذراسی غلطی آپ کے تعمیراتی منصوبے کو متاثر کرسکتی ہے۔
کسی کے بھی گھر جائیں تو ہماری سب سے پہلی نگاہ گھر کے مرکزی دروازے پر ہی پڑتی ہے۔ گھر بھلے جتنا ہی خوبصورت بنالیا جائے، اگر دوران تعمیر آپ نے مرکزی دروازے کا درست انتخاب اور اس کی تنصیب میں دانشمند ی کا مظاہر ہ نہ کیا تو اس سے آپ کے گھر کی خوبصورتی متاثر ہو سکتی ہے۔ ہو سکتاہے کہ آپ کا منتخب کردہ دروازہ دلکش و نایا ب ہو لیکن کیا وہ اتنی گنجائش رکھتا ہے کہ اس میں سے ضروری سامان بآسانی گزارا جاسکے۔
گھر کے مرکزی دروازے کے ليے مضبوطی کے ساتھ ساتھ انفرادیت، جدت اور خوبصورتی بیک وقت ضروری ہوتی ہے۔ تخلیقی فنکاری اورماہرانہ نفاست آپ کے ذوق کی ترجمانی کرتی ہے۔ برقی اور خودکار نظام سے لیس مرکزی دروازہ حفاظتی نقطہ نگاہ سے زیادہ محفوظ سمجھا جاتا ہے، جن میں آپ کیمروں سمیت دیگر سمعی اوربصری آلات نصب کرسکتے ہیں لیکن بات وہی ہے کہ ایک بار آپ نے درواز ہ لگالیاتو بعد میں اس میںردّوبدل مشکل ہو جاتی ہے۔ اس لیے کوشش کریں کہ دروازے کا انتخاب سوچ سمجھ کر کریں۔
اسٹیل ہو یا لکڑی، دونوں مٹیریل سے بنے دروازں میں بے شمار اسٹائل اور دلکش انداز موجود ہیں، جن میں متعدد جدید جیومیٹریکل اور رنگین ا سٹائل اپنی بناوٹ اور اشکال کے اعتبار سے نہایت ہی خوبصورت اور مضبوط ہیں۔ آج کل کے مشہور اور معروف انداز میں چوڑی لکڑی کا دروازہ بھی شامل ہے۔
دروازے کے ساتھ لگا ہوا شیشے کا پینل اسے اور شاندار انداز دے سکتاہے۔ لکڑی اور شیشے کے ملاپ سے بنا دروازہ ہمیشہ بہت خوبصورت اور منفرد لگتا ہے جبکہ گہرے رنگ کے شیشے اس کے حسن کو مزید دوبالا کر دیتے ہیں۔
مضبوط اور بڑا دروازہ
اگر آپ کے گھر کا دروازہ بڑا اور مضبوط ہو گاتو یہ دیکھنے والے پر اپنا تاثر چھوڑے گا۔ بڑے دروازے کا خوبصورت ڈیزائن گھر کے بارے میں اچھی رائے قائم کرنے میں مدد دیتا ہے۔ عام طور پر اس قسم کے دروازے بڑی حویلیوں، فارم ہاؤس اور بڑے گھروں کے مرکزی دروازوں کے لئے زیادہ موزوں رہتے ہیں۔
نقش و نگار والا دروازہ
دیہی طرز پر بنا ہوا نقش و نگار والا ڈیزائن شہروں میں بھی مقبول ہوتا جارہا ہے۔ لکڑی کے دروازے پر خوبصورت نقش و نگاری والے ایسے دروازے بادشاہوں کے دور میں بھی بہت مقبول ہوا کرتے تھے اور آج کے جدید دور میں بھی ان کی مقبولیت اور خوبصورتی میں کوئی کمی نہیں آئی ہے۔
سرکنے والا آہنی دروازہ
آہنی دروازے حفاظتی نقطہ نظر سے زیادہ محفوظ تصور کیے جاتے ہیں۔ لوہے کے دروازوں کے بہت سے ڈیزائن مارکیٹ میں دستیاب ہیں۔ دروازے کی مناسبت سے بیرونی دیوار میں بھی لوہے کی سلیب والا ڈیزائن شامل کیا جاسکتا ہے، یہ آپ کے گھر کی خوبصورتی کو مزید نکھارنے کے ساتھ اسے مضبوطی بھی فراہم کرے گا۔
سفید اور کریم کلر کا امتزاج
دروازے کا رنگ نہایت اہمیت کا حامل ہوتا ہے۔ اس لئے اس کے رنگ کے انتخاب میں خاص احتیاط کرنی چاہئے۔ کریم رنگ کی بیرونی دیواروں کے ساتھ سفید رنگ کا مرکزی دروازہ ایک خوبصورت منظر پیش کر سکتاہے یا چاہیں تو سیاہ رنگ بھی کرواسکتے ہیں۔
سرمئی رنگ کے ساتھ لکڑی کا دروازہ
لکڑی ایک ایسا عنصر ہے، جس سے انتہائی دلکش ڈیزائن مرتب کئے جا سکتے ہیں، اس لئے لکڑی کو مرکزی دروازہ کے لئے بہت پسند کیا جاتا ہے۔ آپ انٹرنیٹ یا میگزینز میں مختلف اسٹائلز دیکھ سکتے ہیں کہ سرمئی رنگ اور لکڑی کے دلکش ڈیزائن پُر بہار اور اپنی مثال آپ ہوتے ہیں۔
سرکنے والا لکڑی کا بڑا پھاٹک
اس قسم کے ڈیزائن عموماً فارم ہاؤس یا دیہی علاقوں کی بڑی بڑی حویلیوں میں استعمال ہوتے ہیں، یہ ایک روایتی مگر دیہی ڈیزائن ہے۔ بڑے سے پھاٹک نما دروازے کو کھولنے اور بند کرنے کے لئے زمین پر ریلنگ نصب کی جاسکتی ہے۔ اسے بہت آسانی سے بند کیا اور کھولا جا سکتا ہے۔
اسٹیل سلیب پر مشتمل دروازہ
لکڑی کی طرح دروازوں میں ا سٹیل کے استعمال کا رجحان بھی بڑھتا جا رہا ہے، کیوں کہ یہ مضبوط ہوتا ہے اور کسی بھی ا سٹائل میں بنایا جا سکتا ہے۔ دروازے کے اوپر سیمنٹ سے بنا شیڈ ایک عمدہ اضافہ ثابت ہو سکتاہے۔
دروازے کے ساتھ بالکونی
آپ لکڑی یا لوہے کا مرکزی دروازہ لگاکر اس کے ساتھ گیراج اور اس کی چھت پر بالکونی بنواسکتے ہیں۔ یہ اسٹائل بہت خوبصورت اور زیادہ فعال معلوم ہوتا ہے۔
