فرمان الہی
نماز کے اوقات
پاکستان شوبز انڈسٹری کے معروف میزبان و اداکار فیصل قریشی نے اپنی بیٹی کی ہر دلعزیز گلوکار و نعت خواں جنید جمشید سے ملاقات کا دلچسپ قصّہ سنا دیا۔
فیصل قریشی آج کل ایک نجی ٹی وی کی رمضان ٹرانسمیشن کی میزبانی کے فرائض انجام دے رہے ہیں۔
اُنہوں نے رمضان ٹرانسمیشن میں بطور مہمان آئے گلوکار ہارون شاہد کے ساتھ جنید جمشید کے بارے میں بات کرتے ہوئے بتایا کہ جب میری بیٹی آیت تقریباً 3 سال کی تھی اور وہ اپنے اسکول میں ہونے والی کسی تقریب کے لیے ملی نغمہ’دل دل پاکستان‘ کی ریہرسل کر رہی تھی۔
اداکار نے بتایا کہ اسی وقت مجھے جنید بھائی کی کال آئی تو میں نے اپنی بیگم کو بتایا کہ میں جنید بھائی کے ساتھ جا رہا ہوں تو وہ کہنے لگیں کہ آیت ابھی اُنہی کے گائے ہوئے ملی نغمے کی ریہرسل کر رہی ہے۔
اُنہوں نے بتایا کہ میں گھر سے نکل کر جنید بھائی کے ساتھ چلا گیا اور جب ہم نماز پڑھ کر آپس میں باتیں کرنے لگے تو میں نے اُنہیں بتایا کہ میری بیٹی ابھی گھر پر اپنے اسکول کی کسی تقریب کے لیے آپ کے مشہور ملی نغمے ’دل دل پاکستان‘ کی ریہرسل کر رہی ہے تو جنید بھائی نے فوراً کہا کہ چلو پھر ہم تمہاری بیٹی سے ملنے چلتے ہیں۔
فیصل قریشی نے بتایا کہ میں نے اپنی بیوی کو فون کر کے بتایا کہ جنید بھائی گھر پر آیت سے ملنے آ رہے ہیں تو یہ سن کر آیت بہت خوش ہوئی اور فوراً تیار ہو کر بیٹھ گئی لیکن جیسے ہی اس نے جنید بھائی کو دیکھا تو رونے لگ گئی۔
اُنہوں نے بتایا کہ جب میں نے آیت سے رونے کی وجہ پوچھی تو کہنے لگی کہ آپ نے مجھ سے جھوٹ بولا یہ تو جنید جمشید نہیں کوئی اور ہیں۔
اداکار نے بتایا کہ آیت نے جنید جمشید کو صرف پرانی ویڈیوز میں دیکھا تھا اس لیے وہ جنید جمشید کو داڑھی کے ساتھ نئے روپ میں پہچان نہیں سکی پھر جنید بھائی نے آیت سے کہا کہ چلو میں آپ کے سامنے ’دل دل پاکستان‘ گا کر سناتا ہوں۔
اُنہوں نے بتایا کہ جنید بھائی نے آیت کو یقین دلانے کے لیے اس کے سامنے بیٹھ کر پورا ملی نغمہ گایا اور میں حیرت سے اُنہیں دیکھتا رہا۔
