فرمان الہی
نماز کے اوقات
ہیوسٹن، ٹیکساس میں حضرت علیؓ کا یومِ شہادت مذہبی عقیدت اور احترام کے ساتھ منایا گیا۔
اس سلسلے میں درعباس سینٹر ہیوسٹن، انجمن غلامان عباس کے زیرِ انتظام شہادت امیر المومنین حضرت علیؓ کی مناسبت سے جلوس نکالا گیا، جو ڈاؤن ٹاؤن سے برآمد ہوکر مقررہ راستوں پر گشت کرتا ہوا میئر آفس کے قریب واقع پارک میں اختتام پزیر ہوا۔
جلوس میں شہر بھر کی ماتمی انجمنوں نے نوحہ خوانی کی اور عزاداران نے نبیٔ اکرم ﷺ کے داماد حضرت علیؓ اور اہلِ بیت کو پرسہ پیش کیا۔
مجلسِ عزاء سے مولانا وسیم عباس نے حضرت علیؓ کی حیاتِ طیبہ پر روشنی ڈالتے ہوئے کہا کہ آپ کی ولادت کعبہ میں ہوئی اور شہادت مسجد میں، آپ نے بچپن میں ہی اسلام قبول کیا اور ساری زندگی ﷲ اور اس کے رسولﷺ کی محبت و اطاعت میں گزاری۔
جلوس میں مرد و خواتین عزاداران کی بڑی تعداد نے شرکت کی اور نوحہ خوانوں کے ہمراہ ماتم اور سینہ زنی کے ذریعے اپنی عقیدت و محبت کا اظہار کیا۔
معروف نوحہ خواں سید رضی حیدر، علی عباس، اور شکیل رضا نے پرسوز نوحے پیش کیے جبکہ غلام رضا اور سید ناصر عباس نے سلام پیش کیا۔
اس موقع پر مختلف امام بارگاہوں میں بھی مجالس کا انعقاد کیا گیا۔
مولانا وصی حیدر زیدی نے مرکزی امام بارگاہ المرتضیٰ میں رمضان کی مجلس سے خطاب کیا، جبکہ مسجد علی (علی سینٹر) میں مولانا قاری ڈاکٹر ابرار حسین نے مجلس عزاء سے خطاب کیا۔
ان کا کہنا تھا کہ حضرت علیؓ نے ہمیشہ حق کا ساتھ دیا اور باطل سے مصالحت نہ کی، ہر معرکے، ہر میدان اور ہر امتحان میں صبر و استقامت کا پہاڑ بنے رہے، آپ کی بہادری اور جرأت اہلِ اسلام کے لیے مینارۂ نور ہے۔
