فرمان الہی
نماز کے اوقات
انگلینڈ کے سابق فاسٹ بولر ڈیرن گوف لاہور قلندرز کو پاکستان سپر لیگ (پی ایس ایل) 10 میں ہیڈ کوچ کے طور پر دستیاب نہیں ہوں گے۔
ڈیرن گوف ذاتی وجوہات کی بنا پر پی ایس ایل سیزن 10 کےلیے لاہور قلندرز کے ہیڈ کوچ کی حیثیت سے اپنی ذمہ داریاں سنبھالنے کےلیے دستیاب نہیں ہوں گے۔
ڈیرن گوف جو کرکٹ کی دنیا میں ایک نام رکھتے ہیں، لاہور قلندرز کے سیٹ اپ میں وسیع تجربہ، قیادت اور جوش و جذبہ کے ساتھ شامل ہوئے۔
ان کا فرنچائز کے ساتھ تعلق گزشتہ سال گلوبل ٹی 20 لیگ میں شروع ہوا تھا اور وہ اس سیزن میں پی ایس ایل کے لیے ٹیم میں شامل ہونے والے تھے لیکن ناگزیر مصروفیات کے باعث وہ یہ ذمہ داری نہیں سنبھال سکیں گے۔
اگرچہ ان کا وقت قلندرز کے ساتھ مختصر تھا لیکن ان کی خدمات کو فرنچائز کی جانب سے بے حد سراہا گیا۔
لاہور قلندرز کے چیف آپریٹنگ آفیسر (سی او او) ثمین رانا نے کہا ہے کہ ہمیں افسوس ہے کہ ڈیرن اس سیزن میں ہمارے ساتھ شامل نہیں ہو سکیں گے۔
انہوں نے مزید کہا کہ ہم ان کے ساتھ کام کرنے کے منتظر تھے، ہم ان کی مصروفیات کو مکمل طور پر سمجھتے اور ان کا احترام کرتے ہیں۔
ثمین رانا نے یہ بھی کہا کہ ڈیرن گوف ہمیشہ لاہور قلندرز فیملی کا ایک اہم حصہ رہیں گے اور ہم ان کے لیے نیک تمناؤں کا اظہار کرتے ہیں۔
ایک بیان میں ڈیرن گوف نے بھی اپنی مایوسی کا اظہار کرتے ہوئے کہا کہ یہ میرے اور قلندرز کے لیے افسوسناک خبر ہے کہ میں اس سال پی ایس ایل کے لیے دستیاب نہیں ہو سکوں گا کیونکہ میری کچھ ناگزیر ذاتی مصروفیات آڑے آ گئیں، تاہم، میری نیک خواہشات ٹیم کے ساتھ ہیں کیونکہ جو ایک بار قلندر ہوتا ہے، وہ ہمیشہ قلندر رہتا ہے۔
انہوں نے کہا کہ میرا وقت ٹیم کے ساتھ اور ثمین کے ساتھ کام کرتے ہوئے شاندار رہا اور جن کھلاڑیوں کو ہم نے ڈرافٹ میں حاصل کیا وہ بالکل وہی تھے، جن کی ہمیں ضرورت تھی۔
سابق انگلش فاسٹ بولر کا کہنا تھا کہ امید ہے کہ یہ سب ٹیم کےلیے زبردست کامیابی میں تبدیل ہوگا، میں آپ سب سے مستقبل میں ضرور ملوں گا اور امید ہے کہ اگلے سال پی ایس ایل میں واپسی ہوگی۔
لاہور قلندرز جلد ہی پی ایس ایل 10 کےلیے نئے ہیڈ کوچ کا اعلان کرے گی۔
