فرمان الہی
نماز کے اوقات
اسلام آباد (نیوز رپورٹر) وزیراعظم شہباز شریف نے کہا ہے کہ حکومت صحت کے شعبے میں جدید ٹیکنالوجی بروئے کار لانے کیلئے پرعزم ہے، عالمی یومِ صحت 2025 مناتے ہوئے، آئیے ہم صحت کے لئے ایک مربوط اور کثیر شعبہ جاتی نقطہ نظر کی ضرورت کا اعادہ کریں۔ اس میں صحت کی دیکھ بھال، تعلیم، غذائیت، ماحول اور نظم و نسق میں مربوط اور عملی اقدامات شامل ہونے چاہئیں۔ ہمیں احتیاطی تدابیر پر مبنی صحت کی دیکھ بھال، یونیورسل ہیلتھ کوریج، دماغی صحت کی بہتری اور صحت سے متعلق عدم مساوات کے خاتمے کو اپنی ترجیحات میں شامل کرنا ہوگا۔ ہمارا ہدف یہ ہونا چاہئے کہ ہر فرد کو معیاری صحت کی سہولیات، تربیت یافتہ طبی عملہ، محفوظ علاج اور ضروری ادویات بروقت اور بلا مالی رکاوٹ فراہم ہوں۔ وزیراعظم نے ان خیالات کا اظہار عالمی یومِ صحت کے موقع پر اپنے پیغام میں کیا۔ وزیراعظم نے کہا کہ صحت کے عالمی دن کے موقع پر ہم سب کے لئے صحت اور فلاح و بہبود کے اپنے قومی عزم کی توثیق کرتے ہیں۔ اس سال کا تھیم ’’صحت مند آغاز، امید افزا مستقبل‘‘ زچگی اور نوزائیدہ بچوں کی صحت کی اہمیت کو اجاگر کرتا ہے۔ ماؤں اور بچوں کی صحت، صحت مند خاندانوں، مستحکم برادریوں اور ایک پُرامید قوم کی بنیاد ہے۔ انہوں نے کہا کہ پاکستان نے ماں اور بچے کی صحت کے میدان میں قابلِ ذکر پیش رفت کی ہے، تاہم اب بھی طویل سفر باقی ہے۔ ہماری حکومت، صحت کے شعبے میں جدید ٹیکنالوجی کو بروئے کار لانے اور مضبوط شراکت داری کے قیام کے لیے پرعزم ہے، تاکہ صحت عامہ کی سہولیات میں مزید بہتری لائی جاسکے۔
