فرمان الہی
نماز کے اوقات
پاکستان سپر لیگ (پی ایس ایل) 10 کے 14ویں میچ میں پشاور زلمی نے لاہور قلندرز کو باآسانی 7 وکٹوں سے ہرادیا۔ زلمی کے کپتان بابر اعظم نے رواں سیزن میں اپنی پہلی نصف سنچری بنا کر ٹیم کی جیت میں مرکزی کردار ادا کیا، حسین طلعت بھی ففٹی بنا کر ناقابلِ شکست رہے۔
لاہور قلندرز کی جانب سے دیا گیا 130 رنز کا ہدف پشاور زلمی نے 17ویں اوور میں 3 وکٹوں کے نقصان پر پورا کرلیا۔
زلمی کے کپتان بابر اعظم نے 56 رنز کی ناقابلِ شکست اننگز کھیلی جبکہ حسین طلعت 51 رنز بنا کر ناٹ آؤٹ رہے۔ محمد حارث 20، صائم ایوب 2 اور ٹام کوہلر کیڈمور بغیر کوئی رن بنائے پویلین لوٹے۔
لاہور قلندرز کی جانب سے شاہین آفریدی نے 2 اور حارث رؤف نے ایک وکٹ لی۔
لاہور کے قذافی اسٹیڈیم میں کھیلے جانے والے اس میچ میں پشاور زلمی نے ٹاس جیت کر لاہور قلندرز کو پہلے بیٹنگ کی دعوت دی تھی۔
قلندرز کا آغاز اچھا نہ رہا جہاں اسکی آدھی ٹیم پاور پلے میں ہی پویلین لوٹ گئی۔ فخر زمان 10، سیم بلنگز 9، آصف علی 5، ڈیرل مچل 2 اور عبداللّٰہ شفیق بغیر کوئی رن بنائے آؤٹ ہوئے۔
تاہم ایسے میں آل راؤنڈر سکندر رضا نے اپنی ٹیم کو مشکلات کے بھنور سے نکالنے میں کلیدی کردار اداکا کیا، انہوں نے 30 گیندوں پر اپنی نصف سنچری مکمل کی۔
انہوں نے پہلے 16 رنز بنانے والے شاہین آفریدی، پھر 13 رنز بنانے والے رشد حسین، پھر 10 رنز بنانے والے حارث رؤف کے ساتھ مل کر ٹیم کا اسکور 100 کے پار پہنچایا۔
9ویں وکٹ پر سکندر رضا اور آصف آفریدی کے درمیان 25 رنز کی اہم پارٹنر شپ نے قلندرز کو 129 تک پہنچایا۔
ٹاس کے موقع پر گفتگو کرتے ہوئے پشاور زلمی کے کپتان بابر اعظم کا کہنا تھا کہ کوشش کریں گے کہ پاور پلے کو اچھی طرح استعمال کریں۔ مختلف کنڈیشنز میں خود کو ایڈجیسٹ کرنا ہوتا ہے۔
لاہور قلندرز کے کپتان شاہین آفریدی کا کہنا تھا کہ اچھا مقابلہ ہوگا، تماشائیوں کو مزہ آئے گا۔ لاہور قلندرز کو ہمیشہ کی طرح تماشائیوں کی سپورٹ چاہیے۔
لاہور قلندرز کی ٹیم کپتان شاہین آفریدی، فخر زمان، عبداللّٰہ شفیق، ڈیرل مچل، سیم بلنگز، آصف علی، سکندر رضا، رشد حسین، حارث رؤف، آصف آفریدی اور محمد عاذب پر مشتمل تھی۔
بابر اعظم کی قیادت میں پشاور زلمی کی ٹیم میں صائم ایوب، ٹام کوہلر کیڈمور، محمد حارث، حسین طلعت، مچل اوین، عبدالصمد، الزاری جوزف، لیوک ووڈ، عارف یعقوب اور علی رضا شامل تھی۔
